OpenAI şirkətinin CEO-su Sam Altman ABŞ Senatında çıxış edən zaman həm OpenAI həm də Microsoft və Google kimi böyük texnoloji şirkətlər tərəfindən hazırlanan güclü süni zəka platformalarının nizamlanmasına ehtiyac duqduqları fikri ilə razılaşıb. “Düşünürəm ki, əgər bu texnologiya ilə bağlı nəsə mənfi bir şey baş versə, bu, hər şeyi dəyişə bilər. Biz bunu bildirmək və ola biləcək mənfi hadisələrin qarşısını almaq üçün dövlət ilə əməkdaşlıq etmək istəyirik” - deyə Sam Altman qeyd edib.

    Son illərdə böyük texnoloji şirkətlərin rəhbərləri ABŞ Konqressində qanunvericilərlə mübarizə xarakterli çıxışlar etsələr də, Sam Altman əksinə onların fikirləri ilə tamamilə razılaşıb. O bildirib ki, OpenAI tərəfindən hazırlanan texnologiyalar insanları iş yerlərindən məhrum edə bilərlər. Lakin bununla yanaşı həmin texnologiyalar yeni iş yerlərinin yaranmasına səbəb olacaqlar. Altman-ın fikrincə bu proseslərin maksimal dərəcədə yumşaldılması üçün dövlətin də iştirakı vacibdir.

    O, irimiqyaslı süni zəka modellərinin hazırlanması üçün lisenziyaların verilməsi ilə məşğul olacaq dövlət qurumunun yaradılmasını təklif edib. Bu cür qurum süni zəka modelinin keçməli olduğu testləri və təhlükəsizlik normalarını təyin edə bilər. Bu təklifə cavab olaraq qanunvericilər süni zəkaya nəzarət üzrə müstəqil agentliyin, tərtibatçıları süni zəka modellərinin necə çalışdıqları barəsində məlumatları təqdim etməyə məcbur edəcək normativ-hüquq bazasının və süni zəka sahəsində antimonopoliya əsaslarının yaradılmasını təklif ediblər.