OpenAI 4 günlük iş həftəsini təklif edir

    Technote.az “The Verge” platformasına istinadən bildirir ki, OpenAI süni intellektin iqtisadi təsirləri ilə bağlı yeni siyasət təklifləri təqdim edib. Şirkətin hazırladığı 13 səhifəlik sənəddə əsas ideya ondan ibarətdir ki, AI səbəbilə iş yerlərini ixtisar edən şirkətlərə daha yüksək kapital gəlir vergisi tətbiq olunsun və əldə olunan vəsait sosial rifah sisteminə yönləndirilsin.

    Təkliflər arasında dövlət sərvət fondu yaradılması, “effektivlik dividendləri” hesabına 4 günlük iş həftəsi və işçilərin “insan yönümlü” sahələrə keçidi üçün dövlət proqramlarının maliyyələşdirilməsi də yer alır. Lakin bu təşəbbüs ciddi tənqidlərə də səbəb olub. Ekspertlər bildirir ki, sənəd ideya baxımından müsbət olsa da, Sam Altman və şirkətin əvvəlki siyasi davranışları bu vədlərin reallıqda tətbiqinə şübhə yaradır.

    Tənqidçilər OpenAI-ın keçmişdə AI tənzimləməsi ilə bağlı açıq şəkildə dəstək verdiyi qanun layihələrini gizli şəkildə zəiflətməyə çalışdığını iddia edir. Hətta bəzi hallarda şirkətin hüquqi təzyiq vasitələrindən istifadə etdiyi də vurğulanır. Nəticə etibarilə, OpenAI-ın yeni iqtisadi modeli texnologiyanın gələcəyi üçün maraqlı istiqamət kimi qiymətləndirilsə də, ekspertlər bu təşəbbüsün real siyasi və iqtisadi addımlarla dəstəklənməsinin həlledici olacağını bildirir.