OpenAI Broadcom ilə hazırladığı ilk AI prosessorunu nümayiş etdirdi

    OpenAI şirkəti Broadcom ilə birgə hazırladığı ilk xüsusi süni intellekt çipini təqdim edib. Jalapeño adlanan yeni prosessor şirkətin süni intellekt modellərinin cavab yaratma (inference) prosesini daha sürətli və daha səmərəli işlətmək üçün hazırlanıb.

    Şirkətin açıqlamasına görə, Jalapeño hazırda sınaq mərhələsində olsa da, ilkin nəticələr onun mövcud qabaqcıl həllərlə müqayisədə hər vat enerji sərfiyyatına görə daha yüksək performans təqdim etdiyini göstərir. Maraqlıdır ki, çipin hazırlanması prosesində OpenAI-nin öz süni intellekt modellərindən də istifadə olunub. OpenAI ilə Broadcom arasında əməkdaşlıq ötən ilin oktyabrında elan edilsə də, şirkətin uzun müddətdir Nvidia qrafik prosessorlarından asılılığını azaltmaq üçün öz AI çiplərini hazırladığı barədə məlumatlar yayılırdı. Bu istiqamətdə Google və Amazon kimi texnologiya nəhəngləri də illərdir xüsusi AI sürətləndiricilərindən istifadə edirlər.

    OpenAI prezidenti Qreq Brokman bildirib ki, şirkət öz çiplərini hazırlayarkən məhz süni intellekt sistemlərinin ən çox istifadə etdiyi iş yükünü nəzərə alıb və mövcud həllərin kifayət qədər optimallaşdırmadığı sahələrə fokuslanıb. Jalapeño əsasən inference, yəni əvvəlcədən öyrədilmiş süni intellekt modellərinin istifadəçi sorğularına cavab verməsi prosesini sürətləndirmək üçün nəzərdə tutulub. OpenAI xüsusilə real vaxt rejimində çalışan proqramlaşdırma modellərində bu çipin daha aşağı əməliyyat xərci ilə işlədiyini vurğulayır.

    OpenAI bildirir ki, şirkət artıq yalnız süni intellekt modelləri hazırlamaqla kifayətlənmir. O, həmçinin çip arxitekturası, yaddaş sistemləri, şəbəkə infrastrukturu, planlaşdırma və yerləşdirmə texnologiyalarını da özü optimallaşdıraraq bütün AI ekosistemini vahid şəkildə inkişaf etdirməyi hədəfləyir.