OpenAI ChatGPT-də agentlə alış və ödəniş funksiyası təqdim etdi

    “OpenAI” cümə günü “ChatGPT Wallet” funksiyasını təqdim edib. Bu funksiya süni intellekt agentlərinin istifadəçinin adından məhsul seçib ödəniş etməsi üçündür. Yenilik “ChatGPT” daxilindəki “dots” agentləri ilə işləyir. İlk mərhələdə ABŞ ərazisində məhdud sayda istifadəçiyə açılıb və yalnız 18 yaşdan yuxarı “ChatGPT Pro” abunəçiləri üçündür.

    Funksiya “Visa”, “Mastercard” və “American Express” ilə əməkdaşlıq çərçivəsində hazırlanıb. İstifadəçi ABŞ ərazisində buraxılmış uyğun kartını pul kisəsinə 1 dəfə əlavə edir. Sonra “dots” agentinə almaq istədiyi məhsulu və seçimlərini yazır. Agent uyğun variantları göstərir, seçilən məhsulu səbətə əlavə edir və sifarişi son təsdiq üçün istifadəçiyə göstərir. Beləliklə, hər alış zamanı kart məlumatlarını yenidən yazmaq lazım olmur.

    Ödənişdən əvvəl istifadəçi məhsulları, ümumi məbləği və seçilən kartı yoxlayır. Hər alış “Face ID” və ya barmaq izi kimi təhlükəsizlik yoxlaması ilə təsdiqlənir. Təsdiqdən sonra istifadəçinin agentə hansı əməliyyat üçün icazə verdiyini göstərən ayrıca qeyd yaranır. Yəni agent alış prosesini aparsa da, son qərarı istifadəçi verir və ödənişi özü təsdiqləyir.

    Təsdiqdən sonra ödəniş şəbəkəsi həqiqi kart məlumatlarının əvəzinə token adlı rəqəmsal məlumat yaradır. Onun ayrıca kart nömrəsi, təhlükəsizlik kodu və istifadə müddəti olur. Məbləğ seçilən kartdan tutulur, amma həqiqi kart məlumatları nə “dots” agentinə, nə də satıcıya göndərilir. Satıcı sifarişi hazırlamaq üçün çatdırılma ünvanını və əlaqə məlumatlarını agentdən avtomatik alır.

    Bu üsulla edilən alışlarda kart üzrə bonuslar və uyğun hallarda mübahisəli ödənişlərdən qorunma qüvvədə qalır. Məsələn, məhsul qüsurlu çıxarsa, istifadəçi əməliyyata etiraz edə bilər. “OpenAI” ilkin məhdud buraxılış dövründə funksiyanın uyğun və etibarlı işləyib-işləmədiyini real alışlarla yoxlamağı planlaşdırır. Daha sonra xidmətin daha çox istifadəçi və satıcıya açılması gözlənilir.

    Gələcəkdə istifadəçilər xərc limitləri qoya, məhsul kateqoriyalarını və vaxt aralıqlarını əvvəlcədən seçə biləcəklər. Agent də təsdiqlənmiş bu qaydalar daxilində daha sərbəst alış edə biləcək. Funksiya süni intellekt agentlərinə girişi bloklayan saytlarda işləməyəcək. “Amazon” öz “Alexa” agentinə üstünlük verdiyi üçün belə girişə icazə vermir. “OpenAI” satıcıların agentlə aparılan ticarətə uyğunlaşması üçün alətlər və təlimatlar da yayımlayıb.