OpenAI ChatGPT-də söhbət və işin birləşməsini yaxın həftələrdə sınayacaq

    “OpenAI” “ChatGPT” masaüstü tətbiqindəki “Chat” və “Work” bölmələrini eyni ekranda birləşdirməyə hazırlaşır. Beləliklə, sadə söhbətdən mürəkkəb tapşırıqlara keçəndə bölməni dəyişmək lazım olmayacaq. Sınaq yaxın həftələrdə kiçik istifadəçi qrupu ilə başlayacaq. Yeniliyin hamı üçün nə vaxt açılacağı hələ açıqlanmayıb.

    Hazırda “Chat” adi suallar, fikir mübadiləsi və mətn yazmaq üçündür. “Work” bölməsində araşdırma aparmaq, təqdimat hazırlamaq və sayt qurmaq kimi daha mürəkkəb işləri görmək olur. Yeni interfeysdə istifadəçilər fayl və plaginləri əlavə edə biləcəklər. Görülən işi eyni pəncərədə izləmək və lazım gəldikdə nəticəyə müdaxilə etmək də olacaq.

    Proqramlaşdırma üçün hazırlanmış “Codex” masaüstü tətbiqdə ayrıca bölmə kimi qalacaq. “Plus”, “Pro” və “Business” abunəçiləri üçün “ChatGPT” və “Codex” dekabrdan ortaq istifadə limitinə keçəcək. Gözləntiyə görə, əksər istifadəçilər bu dəyişikliyi hiss etməyəcək. Ancaq mürəkkəb tapşırıqlardan və daha güclü modellərdən yararlananlar limitin yenilənməsini daha tez-tez gözləyə bilərlər. Adi “Instant” söhbətləri ortaq limitə daxil edilməyəcək.

    “OpenAI” ayrıca “ChatGPT Classic” tətbiqini 30 yanvar 2027-ci ildə dayandıracaq. Yeni masaüstü tətbiq çıxandan sonra əvvəlki “ChatGPT” proqramının adı “ChatGPT Classic” olaraq dəyişdirilmişdi. Yeni versiyada “ChatGPT”, “Work” və “Codex” eyni tətbiqdə birləşdirilib. Köhnə proqramdan keçənlərin bütün söhbət tarixçəsi yeni tətbiqdə qalacaq.

    Yeni tətbiq əvvəlki, “macOS” üçün ayrıca hazırlanmış proqramı veb texnologiyalarına əsaslanan “Electron” versiyası ilə əvəz etdiyinə görə tənqid olunmuşdu. Qarışıq interfeys “ChatGPT”, “Work” və “Codex” arasında keçidi də çətinləşdirirdi. “OpenAI” sonradan yuxarı hissəyə keçid düymələri, yan panelə ayrıca menyu əlavə etmişdi. “Anthropic” də sentyabrda “Claude” daxilindəki söhbət və “Cowork” funksiyalarını eyni ekranda birləşdirmişdi.