OpenAI Codex üçün Chrome əlavəsini təqdim etdi

    Technote.az “Engadget” platformasına istinadən bildirir ki, OpenAI proqramlaşdırma sahəsində süni intellekt imkanlarını genişləndirməyə davam edir. Şirkət bu dəfə Codex platforması üçün yeni Chrome əlavəsini təqdim edib. Yeni genişləndirmə sayəsində Codex artıq birbaşa brauzer daxilində işləyərək veb tətbiqləri test edə, açıq tab-lardan məlumat toplaya və Chrome DevTools alətlərindən paralel şəkildə istifadə edə bilir.

    OpenAI bildirib ki, bu yenilik istifadəçilərin brauzeri tam şəkildə Codex-ə təhvil vermədən, eyni anda digər işlərini də davam etdirməsinə imkan yaradır. Başqa sözlə, proqramçılar və texniki istifadəçilər brauzerdə işləyərkən Codex arxa planda kod analizi, test və müxtəlif inkişaf proseslərini həyata keçirə biləcək.

    Şirkət hesab edir ki, Chrome əlavəsi Codex-i yalnız proqramçılar üçün deyil, daha geniş istifadəçi auditoriyası üçün də cəlbedici edə bilər. Çünki müasir iş proseslərinin böyük hissəsi artıq məhz brauzer üzərindən həyata keçirilir. Xatırladaq ki, OpenAI Codex tətbiqini ilk dəfə bu ilin fevral ayında macOS üçün təqdim etmişdi. Aprel ayında isə platformaya əlavə funksiyalar əlavə olunmuşdu. Şirkətin gələcək planları arasında Codex, ChatGPT və Atlas adlı öz brauzerini vahid tətbiqdə birləşdirmək də var. Yeni Chrome əlavəsi həm Windows, həm də Mac cihazlarında işləyir.