OpenAI-dan ayrılan Barret Zoph Google-a qoşuldu

    Süni intellekt sektorunda yüksək səviyyəli rəhbərlərin şirkətlər arasında keçidi davam edir. Thinking Machines Lab-ın həmtəsisçilərindən biri olan və daha əvvəl OpenAI-da çalışan Barret Zoph bu dəfə Google-a qoşulub. Zoph Google-da tədqiqat üzrə vitse-prezident vəzifəsini icra edəcək. Şirkət onun reinforcement learning və süni intellekt modellərinin post-training mərhələsi üzrə təcrübəsindən Gemini modellərinin inkişafında istifadə etməyi planlaşdırır.

    Barret Zophun son illərdəki karyera yolu kifayət qədər diqqətçəkəndir. O, iki il OpenAI-da çalışdıqdan sonra 2024-cü ilin oktyabrında şirkətdən ayrılaraq Mira Murati ilə birlikdə Thinking Machines Lab-ı təsis etmişdi. Murati özü də bundan bir ay əvvəl OpenAI-dan ayrılmışdı. 2026-cı ilin yanvarında Zoph və Thinking Machines-in digər həmtəsisçisi Luke Metz startapdan ayrılaraq yenidən OpenAI-a keçdilər. Daha sonra isə Zophun Thinking Machines-dən əslində işdən çıxarıldığı məlum oldu.

    Zophun OpenAI-a ikinci qayıdışı da uzun çəkmədi. O, burada süni intellekt məhsullarının korporativ satışlarına rəhbərlik edirdi, lakin cəmi beş ay sonra, iyun ayında şirkətdən ayrıldı. İndi isə Zoph daha əvvəl də çalışdığı Google-a geri qayıdıb. Google nümayəndəsi The Wall Street Journal-a açıqlamasında şirkətin onun RL və post-training sahəsindəki təcrübəsini Gemini üzərindəki işlərə cəlb etməyi səbirsizliklə gözlədiyini bildirib. Zophun keçidi süni intellekt sektorunda yüksək səviyyəli mütəxəssislər uğrunda rəqabətin davam etdiyi bir dövrə təsadüf edir. Xüsusilə OpenAI-da son aylarda bir sıra mühüm rəhbər və mütəxəssislərin şirkətdən ayrılması diqqət çəkir.