OpenAI GPT-5.6 modelini iyulun 9-dan ictimai istifadəyə təqdim edəcək

    OpenAI yeni nəsil süni intellekt modeli olan GPT-5.6 seriyasını 9 iyuldan etibarən bütün istifadəçilər üçün mərhələli şəkildə istifadəyə verəcəyini açıqlayıb. Şirkətin X platformasında paylaşdığı məlumata görə, qlobal miqyasda giriş imkanları genişləndirilməyə başlanacaq.

   GPT-5.6 ilk dəfə iyunun sonunda yalnız məhdud sayda etibarlı tərəfdaşlar üçün əlçatan olmuşdu. Buna səbəb isə Donald Tramp-ın iyun ayında imzaladığı süni intellekt üzrə kibertəhlükəsizlik sərəncamı idi. Həmin sənədə əsasən, şirkətlərdən ən güclü AI modellərini ictimaiyyətə təqdim etməzdən əvvəl hökumətin qiymətləndirməsinə könüllü şəkildə təqdim etmələri xahiş olunur.

   OpenAI həmin vaxt bu prosedurun uzunmüddətli standart olmasını istəmədiyini bildirsə də, GPT-5.6-nı daha tez istifadəyə vermək üçün hökumətlə əməkdaşlıq etdiyini qeyd etmişdi.

    Axios-un məlumatına görə, ABŞ hökuməti modeli əlavə testlərdən keçirdikdən və OpenAI ilə bir sıra görüşlər keçirdikdən sonra GPT-5.6-nın geniş istifadəsinə icazə verib. Əlavə yoxlamalar ABŞ Ticarət Nazirliyinin Süni İntellekt Standartları və İnnovasiya Mərkəzi tərəfindən aparılıb. OpenAI isə mümkün sualları operativ cavablandırmaq üçün texniki mütəxəssislərini Vaşinqtona göndərib.