OpenAI o3-pro süni zəka modelini təqdim edib

     OpenAI süni zəka modelinin təkmilləşdirilmiş versiyası olan o3-pro modelini təqdim edib. Bu model əvvəlki o3 versiyası ilə müqayisədə daha inkişaf etmiş və güclüdür. Yeni model məntiqi düşüncə tələb edən çətin tapşırıqları yerinə yetirmək üçün hazırlanıb və proqramlaşdırma da daxil olmaqla bir çox sahədə istifadə oluna bilər. o3-pro məntiqi nəticə çıxarma qabiliyyətinə malik modellər kateqoriyasına aiddir. o3-pro modelinə ChatGPT Pro və Team abunəçiləri üçün 10 iyun tarixindən etibarən çıxış imkanı açılıb. Məlumata əsasən Enterprise və Edu kateqoriyasına aid korporativ müştərilər üçün isə modelə giriş gələn həftə açılacaq. Eyni zamanda, tərtibatçılar üçün də API artıq istifadəyə verilib.

     Ekspert qiymətləndirməsi zamanı o3-pro modeli bütün test olunan kateqoriyalarda əvvəlki o3 modeli ilə müqayisədə daha yüksək nəticələr göstərib. Xüsusilə elm, təhsil, proqramlaşdırma, biznes və mətn yazarlığı sahələrində üstünlük nümayiş etdirib. OpenAI-nin açıqlamasına görə, model cavabların aydınlığı, dolğunluğu və dəqiqliyi, o cümlədən təlimatlara uyğunluq baxımından da daha yüksək qiymətləndirilib. o3-pro əlavə funksiyaları da dəstəkləyir: Veb-axtarış, fayl analizi, vizual məlumatların emalı, Python proqramlaşdırma dili ilə işləmə və yaddaşa əsaslanan cavabların fərdiləşdirilməsi. Lakin qeyd olunur ki, bu yeni modelin cavab yaratma sürəti əvvəlki o1-pro modelindən aşağıdır. Daxili benchmark testlərində o3-pro yüksək göstəricilər əldə edib. Məsələn, 2024-cü il AIME riyaziyyat testində model Google Gemini 2.5 Pro-nu üstələyib.

     Bundan əlavə, Anthropic şirkətinin Claude 4 Opus modelinin son versiyası ilə müqayisədə, o3-pro PhD səviyyəsində təbii elmlər üzrə bilikləri yoxlayan GPQA Diamond testində daha yaxşı nəticə göstərib. Hazırda o3-pro modelinin bəzi məhdudiyyətləri mövcuddur. ChatGPT-də model ilə müvəqqəti söhbətlər texniki nasazlıq səbəbindən aktiv deyil və bu problemin yaxın vaxtlarda OpenAI mütəxəssisləri tərəfindən aradan qaldırılması planlaşdırılır. Bundan əlavə, model görüntü yaratma funksiyasını dəstəkləmir və OpenAI-nin süni zəka əsaslı iş mühiti olan Canvas funksiyası ilə uyğun deyil. İstifadə qiymətinə gəlincə, 1 milyon giriş tokeni üçün ödəniş 20$, 1 milyon çıxış tokeni üçün isə 80$-dır. 1 milyon giriş tokeni təxminən 750 000 sözə bərabərdir. Məsələn, bu həcm Lev Tolstoy-un "Müharibə və Sülh" romanının mətnindən bir qədər çoxdur.

Mənbə: Techcrunch