OpenAI və Getty Images süni intellekt axtarışını daha etibarlı etməyi hədəfləyir

    OpenAI və Getty Images çoxillik əməkdaşlıq müqaviləsi imzalayıb. Razılaşmaya əsasən, Getty Images-in lisenziyalı foto və vizual məzmunları OpenAI-nin axtarış xidmətlərində və ChatGPT platformasında nümayiş etdiriləcək. Getty Images-in baş direktoru Kreyq Piters bildirib ki, yüksək keyfiyyətli və lisenziyalı vizual məzmun süni intellekt əsaslı axtarış sistemlərini daha faydalı və etibarlı edir. Onun sözlərinə görə, tərəflər birlikdə ChatGPT istifadəçilərinə daha zəngin vizual təcrübə təqdim etməyi planlaşdırırlar.

    Maraqlıdır ki, Getty Images bir neçə il əvvəl süni intellekt şirkətlərinə qarşı sərt mövqe nümayiş etdirirdi. Şirkət 2022-ci ildə AI tərəfindən yaradılmış şəkillərin platformasında yerləşdirilməsini qadağan etmiş, daha sonra isə müəllif hüquqlarının pozulduğunu iddia edərək Stability AI-yə qarşı məhkəmə iddiası qaldırmışdı. Lakin son illərdə Getty Images süni intellekt sahəsində strategiyasını dəyişməyə başlayıb. Şirkət 2023-cü ildə öz generativ AI alətini istifadəyə verib və 2025-ci ildə AI əsaslı axtarış sistemi hazırlayan Perplexity ilə də oxşar əməkdaşlıq müqaviləsi imzalayıb.

    Hazırkı razılaşmanın ən diqqətçəkən məqamlarından biri isə Getty Images məzmununun OpenAI modellərinin təlimində istifadə olunub-olunmayacağı ilə bağlı hər hansı məlumatın açıqlanmamasıdır. Şirkət bu barədə hələlik əlavə detal paylaşmayıb.