OpenAI xAI-dan 1 milyon dollardan çox hüquqi xərc tələb edir

    OpenAI və xAI arasındakı hüquqi mübahisə yeni mərhələyə keçib. OpenAI Kaliforniya federal məhkəməsindən xAI-ın qaldırdığı ticarət sirri iddiasının əsassız hesab edilməsini və şirkətin 1 milyon dollardan çox hüquqi xərci ödəməyə məcbur edilməsini istəyib. Məsələ ondadır ki, xAI 2025-ci ildə OpenAI-ı keçmiş əməkdaşlarını işə götürərkən məxfi məlumatlardan istifadə etməkdə ittiham etmişdi. İddianın mərkəzində əvvəllər xAI-da çalışan mühəndis Xuechen Li yer alırdı. Lakin hakim Rita Lin əvvəlcə fevral ayında, daha sonra isə iyun ayında xAI-ın iddiasını kifayət qədər sübut təqdim edilmədiyi üçün rədd edib. Hakimin qərarında bildirilib ki, işdə təqdim olunan faktlar ticarət sirrinin qanunsuz mənimsənilməsini deyil, maksimum halda Silikon Vadisində geniş yayılmış əməkdaş transferini göstərir.

    İndi isə OpenAI məhkəmədən xAI-ın iddianı "pis niyyətlə" qaldırdığına qərar verməsini və buna görə də bütün hüquqi xərcləri ödəməsini tələb edir. ABŞ qanunvericiliyinə əsasən, belə qərar yalnız iddianın qəsdən əsassız şəkildə təqdim edildiyi sübuta yetirilərsə verilə bilər. Maraqlıdır ki, bu müraciətdən cəmi bir neçə gün əvvəl Apple da OpenAI-a qarşı oxşar məzmunlu məhkəmə iddiası qaldırıb. Apple iddia edir ki, OpenAI şirkətin keçmiş əməkdaşlarını işə götürərkən məxfi texniki məlumatların və prototiplərin qanunsuz əldə olunmasına şərait yaradıb. Şikayətdə OpenAI-ın aparat bölməsinin rəhbəri, əvvəllər 24 il Apple-da çalışan Tang Tan və keçmiş Apple mühəndisi Çanq Liu da qeyd olunur.

    Apple-ın iddiasına görə, keçmiş əməkdaşlardan bəziləri şirkətin məxfi dizaynlarını və texniki sənədlərini OpenAI-a aparıblar. Şirkət həm ticarət sirlərinin geri qaytarılmasını, həm də dəymiş ziyanın ödənilməsini tələb edir.