Papa XIV Leo ölümcül avtonom silahların qadağan edilməsinə çağırdı

    Papa XIV Leo süni intellekt sistemlərinin “tərksilah edilməsinə” çağırıb. Cümə günü çıxış edən Papa deyib ki, bu texnologiyanı insanlar idarə etməli, dəyişdirməli və lazım gəldikdə işlətməməlidirlər. O, BMT-yə üzv ölkələri gələn ay Cenevrədə keçiriləcək görüşdə ölümcül avtonom silahların qadağan edilməsinə doğru konkret addımlar atmağa çağırıb.

    Papa XIV Leo vurğulayıb ki, maşınlar yalnız alətdir, insan deyil. Onun sözlərinə görə, süni intellekt sistemlərinə hüquq və ya hüquqi şəxs statusu vermək təhlükəli ola bilər. İnsan həyatı, azadlığı və güc tətbiqi ilə bağlı qərarlar məlumatlı və məsuliyyətli insanların birbaşa nəzarətində qalmalıdır.

    Bu çağırış Papa XIV Leonun may ayında yaydığı ilk böyük sənəddəki mövqeyin davamıdır. Həmin sənəddə süni intellekt dövründə insanın qorunması əsas mövzulardan biri idi. Papa daha əvvəl açıqlamışdı ki, XIII Leo adını texnologiyanın sürətli inkişafının yaratdığı çətinliklərlə üzləşmək üçün seçib. XIII Leo sənaye inqilabı dövründə kilsəyə rəhbərlik etmişdi.

    2024-cü ildə Papa Fransisk də avtonom silahların qadağan olunmasını istəmişdi. O demişdi ki, heç bir maşın insanı öldürmək barədə qərar verməməlidir. Papa XIV Leo da beynəlxalq qurumları ümumi maraqları qorumağa çağırıb. O, süni intellektin hazırlanması və işlədilməsi üçün ortaq qaydalar, müstəqil nəzarət və məsuliyyətin aydın bölüşdürülməsini istəyib. Bu qaydalar qərarların yoxlanmasını, lazım gəldikdə onlara etiraz edilməsini və zərər çəkənlər üçün uyğun həll yollarının tapılmasını asanlaşdırmalıdır.