Reddit süni intellekt əsaslı yeni moderasiya alətlərini genişləndirir

    Reddit platforması süni intellekt əsaslı moderasiya alətlərini genişləndirdiyini açıqlayıb. Şirkət yeni yaradılan bütün subreddit-lərdə Rules Hub adlı AI sistemini istifadəyə verir. Bu qərar isə platformadakı bir çox moderator tərəfindən narazılıqla qarşılanıb. Reddit-in bildirdiyinə görə, Rules Hub böyük dil modelləri (LLM) əsasında işləyir və artıq 700-dən çox subreddit-də sınaqdan keçirilib. Şirkət ilin sonuna qədər bu funksiyanı bütün Reddit icmaları üçün əlçatan etməyi planlaşdırır.

    Yeni sistemin əsas üstünlüyü ondan ibarətdir ki, o, yalnız açar sözlərə deyil, mətnin mənasına və kontekstinə əsasən qərar verir. Məsələn, AI bir istifadəçinin həqiqətən kimisə təhqir edib-etmədiyini, yoxsa sadəcə film sitatı paylaşdığını və ya zarafat etdiyini ayırd edə bilir. Reddit vurğulayır ki, Rules Hub hazırda insan moderatorlarını əvəz etmir. Lakin şirkət uzunmüddətli perspektivdə bu sistem və digər AI alətlərinin platformada 2015-ci ildən istifadə olunan Automoderator alətinin yerini tədricən ala biləcəyini bildirib.

    Automod moderatorların ən çox istifadə etdiyi vasitələrdən biridir. O, müəyyən açar sözləri bloklamaq, spam məzmunu silmək və müxtəlif moderasiya proseslərini avtomatik idarə etmək üçün istifadə olunur.