Redwood Materials-in dəyəri 6 milyard dolları keçdi

    Technote.az “TechCrunch” platformasına istinadən bildirir ki, Redwood Materials süni intellektin sürətlə artan enerji tələbatı fonunda yeni investisiyalar cəlb etməyə davam edir. Şirkətin Series E investisiya raunduna bu dəfə Google də qoşulub.

    Keçmiş Tesla texniki direktoru JB Straubel tərəfindən təsis edilən Redwood Materials ötən ilin oktyabrında Eclipse vençur fondu liderliyində 350 milyon dollarlıq Series E raundunu bağlamışdı. Həmin raunda Nvidia-nın vençur bölməsi NVentures də strateji investor kimi qatılmışdı. Şirkətin açıqlamasına görə, sonradan daxil olan yeni investorlar, o cümlədən Google raundun ümumi həcmini 425 milyon dollara çatdırıb. Mövcud investorlar Capricorn və Goldman Sachs da əlavə investisiya ilə geri dönüblər. Rəsmi qiymətləndirmə açıqlanmasa da, TechCrunch-a danışan mənbə Redwood-un post-money dəyərinin 6 milyard dollardan yuxarı olduğunu bildirib. Bu, şirkətin əvvəlki qiymətləndirməsindən təxminən 1 milyard dollar çoxdur. Yeni investisiya ilə Redwood Materials-in indiyə qədər topladığı ümumi kapital 4,9 milyard dollara çatıb.

    Google və Nvidia kimi texnologiya nəhənglərinin bu raunda marağının əsas səbəbi Redwood-un enerji saxlanması sahəsindəki yeni biznes istiqamətidir. Şirkət bu həllərlə AI data mərkəzlərini və iri sənaye obyektlərini enerji ilə təmin etməyi hədəfləyir. 2017-ci ildə qurulan Redwood Materials əvvəlcə telefon, noutbuk və istehsalat tullantılarından batareyaların təkrar emalı ilə məşğul olub. Buradan çıxarılan litium və nikel kimi materiallar daha sonra Panasonic kimi şirkətlərə satılıb. Son illərdə Redwood fəaliyyətini genişləndirərək katod istehsalına başlayıb və ötən yay Redwood Energy adlı yeni enerji saxlanma biznesini işə salıb. Bu sistemlər hələ tam utilizasiya olunmayan elektromobil batareyalarının ikinci həyatını təmin edərək AI data mərkəzləri üçün mikro-şəbəkələr yaradır.

    Şirkət bildirib ki, Şimali Amerikada istifadə olunmuş və ya atılmış batareya paketlərinin 70 %-dən çoxunu bərpa edir. Hazırda ehtiyatında 1 GWh-dan çox enerji saxlama potensialı var və yaxın aylarda daha 4 GWh əlavə olunması gözlənilir. Redwood-un hədəfi 2028-ci ilə qədər 20 GWh həcmində şəbəkə miqyaslı enerji saxlama sistemləri qurmaqdır.