Signal Android cihazlar üçün yeni "Linked Devices" funksiyasını sınaqdan keçirir

    Signal messenceri beta versiyasında istifadəçilərin uzun müddətdir gözlədiyi yeni funksiyanı sınaqdan keçirməyə başlayıb. Yenilik sayəsində artıq Android telefon və ya planşeti əsas hesaba ikinci cihaz kimi qoşmaq mümkün olacaq. İndiyədək Signal-da ikinci Android telefondan istifadə etmək üçün ayrıca telefon nömrəsi ilə yeni hesab yaratmaq tələb olunurdu. Yeni funksiya isə eyni hesabın bir neçə Android cihazda istifadəsinə və mesajların cihazlar arasında sinxronlaşdırılmasına imkan verəcək.

    İkinci Android cihazı qoşmaq üçün istifadəçi həmin cihazda Signal tətbiqini quraşdırmalı, qeydiyyat mərhələsində telefon nömrəsini daxil etmək əvəzinə menyudan "Link device" seçimini etməlidir. Daha sonra əsas telefonda Settings > Linked devices > Link a new device bölməsinə daxil olaraq ekranda görünən QR kodu skan etmək kifayətdir. Qoşulma zamanı istifadəçilər çat tarixçəsini ikinci cihazla sinxronlaşdırmaq və ya etməmək seçiminə də sahib olacaqlar. Əgər ilk mərhələdə sinxronizasiya deaktiv edilərsə, sonradan bunu aktivləşdirmək üçün ikinci cihazda Signal tətbiqini yenidən quraşdırmaq lazım gələcək.