Sora tezliklə birbaşa ChatGPT-yə inteqrasiya oluna bilər

    Technote.az “The Verge” platformasına istinadən bildirir ki, OpenAI-ın süni intellekt əsaslı video yaratma aləti Sora yaxın vaxtlarda birbaşa ChatGPT platformasının daxilində istifadəçilərə təqdim oluna bilər. The Information nəşrinin yaydığı məlumata görə, hazırda yalnız ayrıca sayt və ya müstəqil tətbiq kimi mövcud olan Sora gələcəkdə ChatGPT-nin daxili funksiyalarından birinə çevrilə bilər.

    Hazırda Sora ayrıca xidmət kimi ChatGPT qədər geniş populyarlıq qazana bilməyib. Yeni inteqrasiya baş tutarsa, istifadəçilər ötən il çatbota əlavə edilən şəkil yaratma funksiyasında olduğu kimi, videoları da birbaşa ChatGPT üzərindən generasiya edə biləcəklər. Bu addımın platformaya yeni istifadəçilər cəlb etməsi gözlənilir.

    Mütəxəssislər bu yeniliyin risklər də yarada biləcəyini qeyd edir. Sora ilk dəfə istifadəyə verildikdə bəzi istifadəçilər tarixi şəxslərin realistik deepfake videolarını yaratmış, həmçinin müəllif hüquqları ilə qorunan məzmunlar paylaşılmışdı. Funksiyanın ChatGPT daxilində daha əlçatan olması deepfake videoların sayını artıra və istifadəçilərin təhlükəsizlik məhdudiyyətlərini aşmaq üçün yeni üsullar tapmasına səbəb ola bilər.

    Sora-nın ChatGPT-yə əlavə olunması OpenAI-ın artan rəqabət fonunda atdığı strateji addım kimi də qiymətləndirilir. Son həftələrdə Anthropic şirkətinin Claude adlı süni intellekt modeli sürətlə populyarlaşarkən, ChatGPT tətbiqində silinmə hallarının artdığı bildirilir. Anthropic-in ABŞ Müdafiə Nazirliyinin kütləvi nəzarət və tam avtonom silah sistemləri ilə bağlı təklifini rədd etməsi şirkətə ictimai dəstək qazandırdığı halda, OpenAI-nin bu şərtlərlə razılaşması bəzi istifadəçilərin platformadan uzaqlaşmasına səbəb olub.