SpaceX Tesla və süni intellekt üçün çip istehsal edəcək nəhəng kompleks qurur

    SpaceX ABŞ-nin Texas ştatında planlaşdırdığı nəhəng yarımkeçirici istehsalı layihəsi üçün mühüm mərhələni geridə qoyub. Grimes dairəsinin komissarları 3 iyun tarixində keçirilən səsvermədə şirkətin "Terafab" adlı zavod layihəsi üçün reinvestisiya zonasının yaradılmasını 4-ə qarşı 1 səslə təsdiqləyiblər. Qərar SpaceX-ə birbaşa vergi güzəşti təqdim etməsə də, gələcəkdə belə güzəştlərin tətbiqi üçün hüquqi zəmin yaradır. Bununla yanaşı, layihəyə ayrılacaq potensial vergi güzəştləri ilə bağlı yekun qərarın ayrıca səsvermə ilə qəbul ediləcəyi bildirilib.

    Yeganə etiraz səsi verən komissar David Tullos layihənin özünə deyil, prosesin şəffaflığına etiraz etdiyini qeyd edib. Onun sözlərinə görə, SpaceX nümayəndələrinin əvvəlki görüşlərdə iştirak etməməsi və layihənin əhatə dairəsi ilə bağlı məlumatların dəqiq təqdim olunmaması müəyyən suallar yaradıb. Yerli rəhbərlik Terafab layihəsini region üçün "nəsilləri dəyişəcək" bir investisiya kimi qiymətləndirir. Məlumata görə, layihənin ümumi dəyəri 100 milyard dollardan çox ola bilər. Zavodun fəaliyyətə başlaması nəticəsində təxminən 2 min yeni iş yerinin yaradılması və illik əməkhaqqı fondunun 1 milyard dollara çatması gözlənilir.

    Terafab kompleksi SpaceX-in yarımkeçirici sənayesində tam inteqrasiya olunmuş istehsal mərkəzi yaratmaq planının bir hissəsidir. Burada çiplərin dizaynı, istehsalı, qablaşdırılması və test mərhələləri eyni məkanda həyata keçiriləcək. İstehsal olunacaq çiplərin ilk növbədə Tesla məhsullarında, daha sonra isə süni intellekt sistemlərində istifadə olunması nəzərdə tutulur. Layihənin Texas ştatındakı keçmiş Gibbons Creek Reservoir ərazisində inşa ediləcəyi bildirilir. Mütəxəssislərin hesablamalarına görə, bu investisiya Grimes dairəsinin vergi bazasını 500 %-ə qədər artıra və bölgənin iqtisadi strukturunu köklü şəkildə dəyişə bilər.