Spotify AI DJ funksiyasını daha çox ölkədə istifadəyə verdi

    Technote.az “Mashable” platformasına istinadən bildirir ki, Spotify süni intellektlə çalışan “AI DJ” funksiyasını yeni bazarlarda istifadəyə açdığını elan edib. Şirkətin 2023-cü ildə ilk dəfə təqdim etdiyi bu xüsusiyyət indiyədək əsasən ABŞ və Kanadada mövcud idi. İndi isə AI DJ Avstriya, Fransa, Almaniya, İtaliya, Portuqaliya, İsveçrə, Braziliya və Cənubi Koreyada da istifadəyə verilib.

    AI DJ istifadəçinin musiqi zövqünü və dinləmə tarixçəsini analiz edərək fərdi pleylist hazırlayır. Funksiya eyni zamanda radio aparıcısını xatırladan insanabənzər səsli şərhlərlə mahnıları təqdim edir və istifadəçiyə şəxsi radio təcrübəsi yaşatmağı hədəfləyir.

    Spotify yeni genişlənmə ilə birlikdə AI DJ üçün fransız, alman, italyan və Braziliya portuqalcası dillərini də əlavə edib. Şirkətin bildirdiyinə görə, funksiya hazırda dünyanın 75-dən çox bazarında aktivdir.

    İstifadəçilər AI DJ funksiyasını Spotify tətbiqinin əsas səhifəsindəki “DJ” bölməsindən və ya axtarış hissəsindən tapa bilərlər. Funksiya səs və mətn əmrlərini dəstəkləyir. Dil dəyişdirmək üçün isə istifadəçilər üç nöqtəli menyudan istədikləri dili seçə bilərlər.

    Spotify qeyd edib ki, AI DJ hələ də beta mərhələsindədir və bütün funksiyalardan istifadə etmək üçün tətbiqin ən son versiyasını yükləmək lazımdır.