Spotify AI köməkçisini təqdim etdi

    Spotify Premium istifadəçiləri üçün süni intellekt əsaslı yeni "Talk to Spotify" funksiyasını beta mərhələsində istifadəyə verib. Yeni imkan istifadəçilərə tətbiqi səs və ya mətn vasitəsilə idarə etməyə, pleylistlər yaratmağa, musiqilər haqqında məlumat almağa və dinləmə tarixçələrini araşdırmağa şərait yaradır. Funksiya mobil tətbiqin Home və Now Playing bölmələrində işləyir. İstifadəçilər "Mənim eşitmədiyim ifaçılardan musiqi çal", "Bad Bunny də əlavə et" və ya "Daha enerjili mahnılar seç" kimi səsli əmrlər verə bilirlər. Süni intellekt istifadəçinin istəklərinə uyğun olaraq musiqi seçimini davamlı şəkildə dəqiqləşdirə bilir.

     Bununla yanaşı, dinlənilən mahnını birbaşa yadda saxlamaq, növbəyə əlavə etmək və ya ifaçını izləmək də səsli əmrlərlə mümkün olacaq. Yeni AI funksiyası yalnız musiqi idarəetməsi ilə məhdudlaşmır. İstifadəçilər mahnılar, albomlar və ifaçılar haqqında da suallar verə biləcəklər. Məsələn, albomun nə vaxt yayımlandığını, hansı janra aid olduğunu və ya hansı ideyadan ilhamlandığını öyrənmək mümkün olacaq. Hazırda "Talk to Spotify" beta versiyası yalnız 18 yaşdan yuxarı Premium istifadəçilər üçün ABŞ, İrlandiya və İsveçdə, iOS və Android cihazlarında, ingilis dilində mərhələli şəkildə istifadəyə verilir.