Spotify istifadəçilərə AI ilə mahnıları remiks etməyə imkan verəcək

    Spotify süni intellekt vasitəsilə mahnılardan remikslər yaratmağa imkan verəcək yeni platforması üçün daha bir böyük musiqi şirkəti ilə razılaşıb. Şirkətin yeni tərəfdaşı müstəqil musiqi nəşriyyatı Kobalt olub. Kobalt Phoebe Bridgers və IDLES daxil olmaqla çoxsaylı ifaçı və bəstəkarların musiqi hüquqlarını təmsil edir. Razılaşmaya əsasən, Kobalt tərəfindən təmsil olunan musiqiçilər istədikləri halda mahnılarının Spotify-ın yeni AI platformasında istifadəsinə icazə verə biləcəklər.

    Yeni xidmət Spotify istifadəçilərinə süni intellekt alətlərindən istifadə edərək mövcud mahnıların fərqli versiyalarını və remikslərini yaratmağa imkan verəcək. Əsas fərq isə istifadə olunan musiqilərin rəsmi şəkildə lisenziyalaşdırılmasıdır. Spotify bildirir ki, sistem musiqiçilərin icazəsi əsasında işləyəcək və yaradılan məzmun sənətçilər üçün əlavə gəlir mənbəyinə çevrilə bilər. Şirkətin fikrincə, bu yanaşma eyni zamanda mahnıların yeni auditoriyalar tərəfindən kəşf edilməsinə kömək edəcək.