Spotify qurucusunun AI əsaslı startapı ABŞ bazarına daxil olur

    Spotify-ın həmtəsisçisi Daniel Ek-in yaratdığı Neko Health startapı ABŞ bazarına çıxmağa hazırlaşır. Şirkət son investisiya mərhələsində 700 milyon dollar vəsait cəlb edib və bu ilin sonunadək ilk klinikasını Nyu-Yorkda açmağı planlaşdırır. Neko Health süni intellekt və xüsusi hazırlanmış tibbi avadanlıqlardan istifadə edərək tam bədən skanları və qan analizləri həyata keçirən özəl klinikalar şəbəkəsidir. Şirkətin məqsədi ürək-damar xəstəlikləri və diabet kimi problemləri erkən mərhələdə aşkar edərək xəstəliklərin qarşısını almaq və insanların daha uzun, sağlam ömür sürməsinə kömək etməkdir.

    Şirkətin həmtəsisçisi və baş icraçı direktoru Hjalmar Nilsonnenin sözlərinə görə, yeni investisiya ABŞ-də fəaliyyətin genişləndirilməsi və profilaktik tibbi xidmətləri daha əlçatan edəcək texnologiyaların hazırlanmasına yönəldiləcək. İlk klinika Nyu-Yorkda fəaliyyətə başlayacaq, daha sonra isə ABŞ-nin digər şəhərlərində də filialların açılması planlaşdırılır.

    2018-ci ildə təsis edilən, lakin 2023-cü ildən aktiv fəaliyyət göstərən Neko Health hazırda Böyük Britaniya və İsveçdə ümumilikdə 8 klinika idarə edir. Böyük Britaniyada tam bədən skanının qiyməti 299 funt sterlinq, İsveçdə isə 2 750 kron (təxminən 285 ABŞ dolları) təşkil edir. ABŞ bazarı üçün qiymətlər hələ açıqlanmayıb. Şirkətə maraq kifayət qədər yüksəkdir. Neko Health bildirir ki, indiyədək 350 mindən çox insan müayinəyə yazılıb və ya gözləmə siyahısına qoşulub. Bu günə qədər isə 100 min nəfərdən çox şəxs şirkətin tam bədən skanından keçib.