Spotify süni intellektlə yaradılmış ifaçılara qarşı yeni qayda tətbiq edir

    Spotify süni intellektlə yaradılmış virtual ifaçı profillərinə qarşı yeni qaydalar tətbiq etməyə hazırlaşır. Şirkət insan deyil, süni intellekt vasitəsilə yaradılmış kimliyə sahib ifaçı profillərinə xüsusi “AI Persona” nişanı əlavə edəcək. Yeni qaydanın ən vacib tərəfi isə yalnız nişanla bağlı deyil. AI Persona kimi işarələnən ifaçılar standart olaraq Spotify-ın redaksiya və alqoritmik tövsiyələrindən çıxarılacaq. Yəni belə ifaçıların mahnılarının istifadəçilərə avtomatik tövsiyə edilməsi və kəşf bölmələrində qarşılarına çıxması xeyli məhdudlaşacaq.

    Spotify iki fərqli nişandan istifadə edəcək. İfaçılar Spotify for Artists platformasından öz profillərini “AI Persona” kimi qeyd edə biləcəklər. Bununla yanaşı, Spotify özü də süni intellektlə yaradıldığı ehtimal edilən fotorealistik virtual şəxsiyyətləri müəyyənləşdirərək onların profilinə “Likely AI Persona” nişanı əlavə edə biləcək. Şirkət bu prosesdə yalnız ifaçıların öz bəyanatlarına güvənməyəcəyini bildirir. Süni intellektin aşkarlanması üçün texnoloji alətlərlə yanaşı, insan moderatorların yoxlamalarından da istifadə olunacaq. İlk növbədə daha böyük auditoriyaya sahib profillərin yoxlanılması nəzərdə tutulur.

    Yeni nişanların sentyabrın ortalarından etibarən ilk olaraq mobil tətbiqdə görünməsi planlaşdırılır. İşarələr ifaçının profilində, “About” bölməsində, axtarış nəticələrində və pleylistlərdə mahnıların yanında göstəriləcək. Sonrakı aylarda istifadəçilərin nişanlanmamış şübhəli AI profillərini Spotify-a bildirməsinə imkan verən funksiya da istifadəyə veriləcək. Spotify xüsusi olaraq vurğulayır ki, bu qayda musiqinin necə hazırlandığını deyil, ifaçının kimliyini əhatə edir. Məsələn, real müğənninin mahnı hazırlayarkən generativ AI alətlərindən istifadə etməsi onun avtomatik olaraq AI Persona kimi işarələnməsi demək deyil. Qayda əsasən adı, üzü, bioqrafiyası və ümumi ictimai kimliyi süni intellektlə yaradılmış virtual ifaçılara aiddir.