Studiyalar film və seriallar üçün heyvan animasiyalarını süni intellekt ilə hazırlamağa başlayıblar

    Studiyalar artıq çəkiliş meydançasına real heyvanlar gətirmək əvəzinə, post-prodakşn mərhələsində animasiya yaratmaq üçün süni intellekt və kompüter qrafikası texnologiyalarından istifadə etməyə başlayıblar. İndi isə heyvan tərbiyəçiləri, sığınacaqlar və heyvan koordinatorları bu texnologiyaların təsiri ilə bağlı getdikcə daha çox narahat olurlar. Məsələn, “The Morning Show” və “Veronica Mars” kimi seriallarda rol almış Rokko adlı aktyor-it indi “yalnız nadir reklamlarla dolanmağa” məcburdur. “Bu, şübhəsiz ki, artıq studiya tərbiyəçilərinə və heyvanlarla bağlı biznesə ciddi təsir göstərib” - deyə Studio Animal Services şirkətinin sahibi Karin McElhatton bildirib. Bu ilin əvvəlində istedad axtarışı ilə məşğul olan bir studiya süni intellekt vasitəsilə yaradılmış Tilly Norwood adlı rəqəmsal aktrisanın təqdim olunduğunu elan etmişdi ki, bu da Hollywood-da böyük rezonans doğurdu.

    Şirkətlər həmçinin bildiriblər ki, xərcləri azaltmaq məqsədilə süni intellekti kütləvi səhnələrdəki aktyorları əvəz etmək üçün öyrətməyi planlaşdırırlar. Heyvan aktyor sənayesi artıq COVID-19 pandemiyasının və 2023-cü ildə süni intellekt texnologiyalarının tətbiqinə qarşı mübarizə aparan ABŞ Ssenaristlər Gildiyasının tətilinin təsirini hiss edib. İndi isə bəziləri bu sənayenin tamamilə yox ola biləcəyindən narahatdır. Los-Ancelesdə yerləşən Benay’s Bird & Animal Rentals şirkətinin sahibi Benay Karp bildirib ki, heyvanlar üçün “iş yerlərinin” sayı pandemiyadan əvvəlki dövrlə müqayisədə cəmi 40%-ə qədər azalıb. “Elə gəlir ki, mənim ağacdələnə ehtiyacım 3-4 ildir, bəlkə də 5 ildir olmayıb. Məndə qağayı sürüsü var. Son 1 ildə onlara cəmi bir dəfə iş tapa bildim, halbuki əvvəllər onlar mütəmadi işləyirdilər” - deyə o bildirib.

     Məsələn, rejissor James Gunn-ın yay fəslində premyerası olmuş “Superman” filmində Krypto obrazını canlandırmış Ozu adlı it demək olar ki, tamamilə kompüter qrafikası ilə yaradılıb, baxmayaraq ki, çəkiliş meydançasında bir balaca it-dublyor da olub. Texnologiyanın tərəfdarları iddia edirlər ki, süni intellekt heyvanlara qarşı qəddarlıq və istismarı aradan qaldıracaq. “Biz bilirik ki, süni intellekt - digər texnologiyalar kimi - həm xeyirli, həm də zərərli məqsədlər üçün istifadə oluna bilər. Bu halda, bu, əyləncə sənayesində heyvanların əzablarına son qoymaq üçün xeyirxah tətbiqlərdən biridir” - deyə People for the Ethical Treatment of Animals (PETA) təşkilatının film və televiziya üzrə rejissoru Lauren Thomasson bildirib. Tənqidçilər isə hesab edirlər ki, bu dəyişiklik tamaşaçıları yalnız real heyvanların ekranda yarada bildikləri emosional bağdan məhrum edəcək.