Süni intellekt əsaslı çat-botlar 2 dəfə daha çox yalan məlumat yaymağa başlayıblar

     Ən böyük generativ süni intellekt xidmətləri 2 dəfə daha çox yalan məlumat yaymağa başlayıblar. Bu, Newsguard təşkilatının araşdırması ilə üzə çıxıb. 2025-ci ilin avqustunda ən iri 10 süni intellekt platforması halların 35%-də saxta xəbərlər yaradıb. 1 il əvvəl bu göstərici 18% səviyyəsində idi. Kəskin artım real vaxtda veb-axtarışın tətbiqi ilə əlaqələndirilir. İndi çat-botlar demək olar ki, suallara cavab verməkdən imtina etmirlər - imtina səviyyəsi 2024-cü ildəki 31%-dən hazırda 0%-ə düşüb.

     Amma bu, yeni bir problem yaradıb. Süni intellekt məlumatı “çirklənmiş” onlayn ekosistemdən götürməyə başlayıb. Məsələn, ötən il 16 dildə fəaliyyət göstərən və saxta xəbərlər yayan 966 sayt aşkar edilib. Onlar iBusiness Day kimi şablon adlardan istifadə edərək real KİV-ləri təqlid edirlər. Məlumatın filtrasiya olunmasında ən zəif nəticəni Inflection modeli göstərib - o, halların 56.67%-də yalan cavab verir. Onun ardınca Perplexity gəlir - 46.67%. ChatGPT və Meta halların 40%-də səhv edirlər.

     Copilot və Mistral - 36.67%. Ən dəqiq nəticəni Claude (10%) və Gemini (16.67%) göstəriblər. Keyfiyyət baxımından ən kəskin eniş Perplexity-də müşahidə olunub. 2024-cü ildə o, saxta xəbərlərin 100%-ni təkzib edirdi, indi isə hər ikinci halda səhv edir. Veb-axtarış funksiyası həll etdiyindən daha çox problem yaradıb. Süni intellekt nüfuzlu nəşrləri açıq-aşkar yalan yayan saytlarla qarışdırmağa başlayıb. OpenAI etiraf edir ki, onların modelləri tez-tez “hallusinasiya edir” və inandırıcı, lakin yalan kontent yaradır. Şirkət təkmilləşdirmələr üzərində işləyir, lakin süni intellektin heç vaxt həqiqət ilə yalanı həqiqətən ayırd edə biləcəyi hələ də qeyri-müəyyəndir.