Süni intellekt görmə qabiliyyətinin itirilməsini illər öncədən təyin edir

     Süni intellekt keratokonusun - görmə qabiliyyətini itirməyə səbəb ola biləcək göz xəstəliyinin - proqressini proqnozlaşdırmağı öyrənib. Cəmi 1-2 müayinənin məlumatları əsasında sistem 90%-ə qədər dəqiqliklə kimin erkən müdaxiləyə ehtiyacı olduğunu, kimin isə sadəcə müşahidə ilə kifayətlənə biləcəyini müəyyən edir. Bu, yüksək risk daşıyan xəstələrin lazım olan müalicəni daha erkən almasına, riski az olanların isə klinikaya tez-tez getməkdən qaçmasına və tibbi müəssisələrin yükünün azalmasına imkan yaradır. Keratokonus - adətən yeniyetmələrdə və gənclərdə inkişaf edən və böyüklük yaşında proqressivləşən buynuz qişa xəstəliyidir. Təxminən hər 350 nəfərdən birində diaqnoz qoyulur. Yüngül hallarda keratokonus kontakt linzalar vasitəsilə nəzarətdə saxlanıla bilər, lakin vəziyyət sürətlə pisləşərsə, buynuz qişanı möhkəmləndirmək üçün ultrabənövşəyi işıq və B2 vitamini ilə aparılan krosslinkinq proseduru tələb olunur.

     Müalicə olmadıqda isə buynuz qişa transplantasiyası lazım gələ bilər. Keratokonuslu xəstələrin müşahidəsi olduqca vacibdir, çünki həkimlər əvvəlcədən kimdə xəstəliyin proqressivləşəcəyini, kimdə isə vəziyyətin sabit qalacağını müəyyən edə bilmirlər. Bu, vaxtında müalicə təyin etmək üçün uzun illər ərzində mütəmadi müayinələr və buynuz qişanın skan edilməsini tələb edir. Yeni tədqiqatda xəstələrin müşahidəsi tapşırığı süni intellektə həvalə olunub. Süni intellekt gözlərin optik koherent tomoqrafiyası (OKT) vasitəsilə əldə edilən təsvirləri, həmçinin pasiyentlərin digər məlumatlarını təhlil etmək üçün istifadə olunub. Ümumilikdə, süni intellekt alqoritmi 6684 xəstədən 36 673 görüntünü təhlil edib.

     İlk müayinənin məlumatları əsasında o, xəstələri 2 qrupa ayıra bilib: 2/3-si aşağı risk daşıyır və onlara müalicə lazım deyil, 1/3-i isə yüksək riskli olub və krosslinkinqə ehtiyac duyub. İkinci müayinə məlumatı nəzərə alındıqda təsnifatın dəqiqliyi 90%-ə çatıb. Alqoritmdən istifadə yüksək risk daşıyan xəstələrin görmə itkisini önləyərək profilaktik müalicəni daha tez almasına, aşağı riskli xəstələrin isə tez-tez müşahidədən qaçmasına imkan verəcək. Bu, təkcə müalicənin nəticəsini yaxşılaşdırmayacaq, həm də səhiyyə resurslarını ən çox ehtiyacı olan insanlar üçün azad edəcək. Gələcəkdə tədqiqatçılar keratokonusun və digər göz xəstəliklərinin, o cümlədən infeksiyalar və irsi patologiyaların proqressini proqnozlaşdırmaq üçün milyonlarla skan üzərində daha güclü alqoritm öyrətməyi planlaşdırırlar.