Süni intellekt tərtibatçıları süni intellekt səbəbilə ixtisar olunurlar

     Belə bir fikir var ki, süni intellekt əmək bazarına böyük təsir göstərəcək, lakin onun hazırlanmasında iştirak edənlərin ixtisarı barədə məlumatlar çox nadir hallarda yayılır. Bu cür proseslər artıq Meta, xAI və Google şirkətlərində müşahidə olunub. Məlumata görə, yaxın zamanda Google-un süni intellekt sahəsindəki məhsulları üzərində - o cümlədən Gemini çat-botu və axtarış nəticələrindəki AI-overview funksiyası üzərində - işləyən 200-dən çox şəxs işdən azad edilib. Bunlar şirkətin ştat əməkdaşları deyil, onun podratçılarının işçiləri olub - onların bir çoxu Hitachi-yə məxsus proqram təminatı şirkəti GlobalLogic-in heyətində idi. Google üçün işləyən və işdən azad olunan GlobalLogic əməkdaşlarının əsas işi süni intellektin cavablarını qiymətləndirmək və onların keyfiyyətini təmin etmək olub. Onların əksəriyyəti ABŞ-da yerləşir və ingilisdilli kontentlə çalışır, bir çoxunun magistr və ya elmlər namizədi dərəcəsi var.

     Ən azı onların bəzilərinə bildirilib ki, ixtisar səbəbi layihənin dayandırılmasıdır, lakin bu versiyaya hamı inanmayıb. Belə bir fikir var ki, radikal tədbirlər işçilərin maaş və məşğulluq təminatları ilə bağlı etirazları ilə əlaqəlidir. Sənədlərə əsasən, süni intellekt cavablarını qiymətləndirənlərin əməyi qiymətləndirmə prosesini avtomatlaşdıran sistemi öyrətmək üçün istifadə olunur: bir süni intellekti digər süni intellekt moderasiya edəcək. Elon Musk-ın xAI şirkəti bir neçə gün öncə məlumatların işarələnməsi ilə məşğul olan azı 500 əməkdaşını işdən azad etdi - şirkətin izahına görə, bu addım universal işçilərin xidmətlərindən imtina edib onları mütəxəssislərlə əvəzləmək məqsədilə atılıb. Google isə əksinə məhz mütəxəssisləri ixtisar edib.

     Süni intellekt sahəsində fəaliyyətini gücləndirən Meta bir müddət əvvəl məlumatların işarələnməsinə ixtisaslaşmış Scale AI şirkətinin 49% səhmini aldı. Bundan sonra Scale AI öz heyətinin 14%-ni, o cümlədən 200 ştat əməkdaşını və təxminən 500 podratçısını ixtisar edib. Meta özü də süni intellekt şöbəsini ixtisar etmək imkanını ciddi şəkildə nəzərdən keçirir - şirkət sənaye yarışında geri qalmamaq üçün prioritetlərini ciddi şəkildə dəyişir. Çətin bir vəziyyət yaranır. Şirkətin aparıcı mütəxəssislərinə nəhəng məbləğlər təklif olunur, aşağı səviyyəli işçilər və podratçılar isə ixtisara düşür və əvəzolunan hesab olunurlar - vəsait isə dəqiq nəyin üzərində çalışdıqları məlum olmayan şəxslərə axır, çünki süni intellektin hazırlanması adətən ən ciddi gizlilik şəraitində aparılır.