Süni intellekt tibb və hüquq fakültələrinin tələbələrinin təhsilini faydasız edə bilər

     Google-un süni intellekt sahəsindəki pionerlərindən biri olan Jad Tarifi gələcək tibb və hüquq fakültələrinin tələbələrini xəbərdar edib: süni intellektin sürətli inkişafı onların təhsilini faydasız edə bilər. Business Insider-ə müsahibəsində Google-un ilk generativ süni intellekt komandasının qurucusu və Integral AI startapının yaradıcısı bildirib ki, bu peşələr artıq mütəxəssisləri əvəz etməyə başlayan texnologiyalar səbəbilə risk altındadır. Uzun illər davam edən və bahalı təhsil əvəzinə o, daha dar ixtisaslaşmış istiqamətlərə, məsələn biologiyada süni intellektin tətbiqlərinə yönəlməyi, ideal halda isə özünü dərkə diqqət ayırmağı məsləhət görür: meditasiya, ünsiyyət və emosional intellektin inkişafı. Mütəxəssisin sözlərinə görə, o, 2021-ci ildə Google-dan ayrıldıqdan sonra bir çox insan avtomatlaşdırmaqdan qorunmaq üçün yeni diplomlar almağa can atır.

     Lakin o, hesab edir ki, süni intellekt dövründə uzun və bahalı təhsil proqramlarını yalnız öz peşəsinə həqiqətən bağlı olan şəxslər seçməlidir. “Heç kim doktorluq dərəcəsi almamalıdır, əgər o bu sahə ilə yaşamırsa” - deyə Tarifi vurğulayıb. Xüsusilə bu, tibb və hüquq sahəsinə aiddir. Tarifi bildirib ki, həkim və ya hüquqşünas diplomu almaq uzun illər və 100 minlərlə dollar tələb edir, halbuki tibb universitetlərində tədris proqramları köhnəlib və əzbərləməyə əsaslanır. Onun sözlərinə görə, bu gün belə resursların klassik təhsilə yatırılması mənasız xərclərə çevrilə bilər. “Hətta indi həll olunmaz görünən məsələlər, məsələn süni intellektin robototexnikada tətbiqi, tələbə dissertasiya müdafiə edənədək çoxdan həll olunacaq. Ona görə də ya dar ixtisaslaşmış sahə ilə məşğul olun, məsələn, hələ ilkin inkişaf mərhələsində olan biologiya üçün süni intellekt ilə, ya da ümumiyyətlə heç nə ilə məşğul olmayın” - deyə  Tarifi bildirib.

     OpenAI şirkətinin baş direktoru Sam Altman kimi, hansı ki, süni intellektin artıq doktorluq səviyyəsinə yaxınlaşdığını iddia edir, Tarifi də texnologiyaların perspektivlərini olduqca yüksək qiymətləndirir. Bu, həm də Silikon Vadisini insan olmağın mənasını daha dərindən yenidən düşünməyə sövq edən başqa bir stimuldur. Tarifi məsləhət görür ki, yalnız karyera iddiaları ilə kifayətlənməyin, həm də şəxsi inkişafa sərmayə qoyun. “Ən yaxşısı öz üzərinizdə işləməkdir. Meditasiya edin, dostlarınızla ünsiyyət qurun, özünüzü emosional cəhətdən anlamağı öyrənin” - deyə Tarifi qeyd edib.

     Bununla belə, skeptiklər xatırladırlar ki, süni intellektin imkanları hələ mükəmməllikdən uzaqdır: sistemlər dəfələrlə hüquq məsələlərində səhvlərə yol verib və çox vaxt dələduzluq üçün alətə çevrilir. Deməli, yaxın illərdə belə rəqəmsal sistemlərin peşəkarları əvəz edə biləcəklərini iddia etmək hələ tezdir. Digər tərəfdən, tibbi karyera yolu həqiqətən demək olar ki, 10 il çəkir və əgər Tarifi-nin proqnozları doğrularsa, xəstələr intellektual baxımdan qarşılarında duracaq rəqibin olmadığı həkimlər əldə edəcəklər. Amma əgər süni intellekt gözləntiləri doğrultmasa, bəşəriyyət mütəxəssislərin çatışmazlığı ilə üzləşəcək ki, bu da daha ciddi nəticələrə gətirib çıxaracaq.