Süni zəka İT sektordakı iş yerlərini artıq zəbt edir

     ABŞ-da İT mütəxəssisləri arasında işsizlik səviyyəsi may ayında 5.5%-ə yüksəlib. Bu göstərici artıq ardıcıl beşinci aydır ki, davamlı olaraq artır və ölkə üzrə orta göstəricini üstələyir. İT sahəsində idarəetmə üzrə konsaltinq şirkəti Janco-nun hesabatına görə, iş yerlərinin ixtisarı əsasən kommunikasiya sektorunda, eləcə də hesabat, monitorinq və texniki dəstək xidmətlərində cəmlənib. Generativ süni zəka artıq bir neçə ildir ki, iş yerlərini avtomatlaşdırır, baxmayaraq ki, rəhbərlər dəfələrlə bu texnologiyanın işçiləri əvəz etmək yox, onları dəstəkləmək məqsədi daşıdığını bildiriblər.

     Getdikcə daha çox şirkət süni zəka agentlərini işə salaraq iş axınları ilə bağlı qərarları müstəqil şəkildə həyata keçirməyə başlayır və bu tendensiya vəziyyəti yalnız daha da ağırlaşdıracaq. İlk olaraq risk altında qalan işçilər - köhnəlmiş bacarıqlara sahib olan və kiçik və orta şəhərlərdə çalışan İT mütəxəssisləridir. Nyu-York və Dallas kimi meqapolislərdə isə işini itirmək təhlükəsi o qədər də aktual deyil. “Şirkətlər uyğunluq tələblərini yerinə yetirmək üçün yeni işçilər işə götürmək istəmirlər. Nəticədə, onlar bu tapşırıqların, xüsusilə hesabatvə monitorinq sahəsində olanlarının mümkün qədər çoxunu avtomatlaşdırmaq üçün süni zəkaya yönəlirlər” - deyə Janco şirkətinin baş direktoru Victor Janulaitis bildirib.

     Ticarət nəhəngi Klarna-nın baş direktoru Sebastian Siemiatkowski hesab edir ki, “ağ yaxalı” işçilərin neyroşəbəkələrlə əvəz olunması iqtisadiyyatda tənəzzülə səbəb ola bilər. Süni zəka startapı Anthropic-in rəhbəri Dario Amodei isə əmindir ki, süni zəka növbəti 5 il ərzində başlanğıc səviyyəli iş yerlərinin təxminən yarısını yox edəcək və bu da işsizlik səviyyəsinin 20%-ə qədər artmasına gətirib çıxaracaq. Hazırda ABŞ-da İT sahəsindəki vakansiyaların əksəriyyəti böyük dil modelləri üzərində işlə bağlıdır. Eyni zamanda, blokçeyn texnologiyası və çoxkanallı ticarətlə bağlı ixtisaslara da yüksək tələbat mövcuddur.