Süni zəka qan vasitəsilə bağırsaq xərçəngini istənilən mərhələdə dəqiq təyin edir

     Alimlər qan dövranında xərçəng hüceyrələrinin DNT-sini tanımaq üçün yüksək həssaslığa malik biosensor hazırlayıblar. Yeni texnologiya şişin erkən mərhələdə aşkarlanması üçün ideal hesab olunur. Nəticə cəmi 20 dəqiqə ərzində hazır olur. Gələcəkdə bu üsul autoimmun, nevroloji və digər ağır xəstəliklərin diaqnostikasına da uyğunlaşdırılacaq. Xərçəngin inkişafı, qan dövranındakı DNT üzərində çətinliklə aşkar edilən kimyəvi dəyişikliklərin - DNT-nin metilləşməsi adlanan prosesin - baş verməsi ilə əlaqələndirilir. Alimlər bu dəyişiklikləri aşkar etmək üçün biosensorlar hazırlamaq üzərində uzun illərdir çalışırlar.

     Lakin erkən mərhələlərdə metilləşmiş DNT-nin konsentrasiyası çox aşağı olduğundan, bu testlərin həssaslığı indiyə qədər kifayət qədər yüksək olmayıb. İndi isə Cənubi Koreya komandası qan analizinə əsaslanaraq yüksək dəqiqliklə xərçəng əlamətlərini müəyyən edən süni zəka və yüksək həssas optik siqnallar əsasında işləyən bir biosensor təqdim edib. Yeni texnologiya adi biosensorlarla müqayisədə həssaslığı 1000 dəfə artırmağa nail olub. Texnologiyanın dəqiqliyi 60 kolorektal xərçəng xəstəsi üzərində qiymətləndirilib.

     Test xərçəngi aşkar etməkdə 99% dəqiqlik göstərib və birinci mərhələdən dördüncü mərhələyə qədər bütün mərhələləri uğurla ayırd edə bilib. Nəticənin əldə olunması cəmi 20 dəqiqə vaxt aparır. “Bu, heç bir əvvəlcədən hazırlıq tələb etməyən son dərəcə sadə, dəqiq və sürətli diaqnostik vasitədir. Belə bir yanaşma xərçəngin erkən diaqnostikasında böyük üstünlüklər təmin edir” - deyə müəlliflər qeyd ediblər. Təbii ki, bu texnologiya həmçinin müalicənin effektivliyinin qiymətləndirilməsi üçün də istifadə olunacaq. Gələcəkdə bu metodun autoimmun və nevroloji xəstəliklər də daxil olmaqla geniş spektrli xəstəliklərin aşkarlanmasına uyğunlaşdırılması planlaşdırılır.