Videooyun tərtibatçılarının 90%-i videooyunların hazırlanmasında artıq süni intellektdən istifadə edir

     Generativ süni intellekt həyatımızın bütün sahələrinə, o cümlədən videooyunların hazırlanmasına getdikcə daha dərindən nüfuz edir. Bu barədə Google Cloud tərəfindən aparılmış son araşdırmanın nəticələri xəbər verir. Reuters agentliyinin məlumatına görə, 20 iyun - 9 iyul tarixləri arasında Google-un sifarişi ilə The Harris Poll tədqiqat şirkəti ABŞ, Cənubi Koreya, Norveç, İsveç və Finlandiyadan olan 18 yaşdan yuxarı 615 videooyun tərtibatçısı arasında sorğu keçirib. Demək olar ki, bütün respondentlər (97%) generativ süni intellektin oyun sənayesini dəyişdirdiyi ilə razılaşıb, respondentlərin 87%-i isə bu texnologiyanı artıq iş proseslərinə inteqrasiya etdiklərini bildirib. Söhbət aşağıdakı sahələrdə avtomatlaşdırmadan gedir:

- Rutin tapşırıqların yerinə yetirilməsi (95%)

- Oyunun test edilməsi və balanslaşdırılması (47%)

- Lokallaşdırma və tərcümə (45%)

- Kodun və skriptlərin generasiyası (44%)

- Mətn, səs və video daxil olmaqla məlumatların işlənməsi (44%)

- Yeni gameplay və hekayə ideyalarının araşdırılması (37%).

     Araşdırmanın nəticələrinə görə, tərtibatçıların 94%-i uzunmüddətli perspektivdə süni intellektin istehsal xərclərini azaldacağını gözləyir. Lakin bu investisiyaların özünü doğruldub-doğrultmayacağını qiymətləndirmək çətin ola bilər (22%). Respondentlərin təxminən 2/3-si (63%) mülkiyyət hüquqları, oyunçuların məlumatlarının məxfiliyi (35%), lisenziyalaşdırma (32%) və süni intellekt tərəfindən yaradılmış kontentə sahiblik (32%) məsələləri ilə bağlı narahatlıqlarını ifadə ediblər. Oyun yayımçıları getdikcə daha çox süni intellektə müraciət edirlər ki, tərtibat xərclərini azaltsınlar və istehsal müddətinin uzanmasını kompensasiya etsinlər. Eyni zamanda, generativ süni intellektin oyunlarda istifadəsi hələ də mübahisəli məsələ olaraq qalır. Keçən yay ABŞ Aktyorlar İttifaqı böyük oyun şirkətlərinə qarşı tətil keçirmişdi, səbəblərdən biri də onların məhsullarında generativ süni intellektin istifadəsinin tənzimlənməsi idi. Demək olar ki, 1 il sonra tərəflər yeni şərtlər üzərində razılığa gələ bildilər.