xAI-ın nəhəng məlumat mərkəzləri ABŞ-də ekoloji mübahisəyə səbəb olub

    ABŞ Konqresinin Nümayəndələr Palatasında Enerji və Ticarət Komitəsinin aparıcı demokrat üzvü Frank Pallone, Elon Musk-dan xAI şirkətinin nəhəng məlumat mərkəzlərinin ətraf mühitə təsiri ilə bağlı açıqlama tələb edib. Pallone iyulun 29-da göndərdiyi məktubda xAI-dan məlumat mərkəzlərinin emissiyaları, qaz turbinləri üçün alınmış icazələr, elektrik və su sərfiyyatı, eləcə də dövlət qurumları ilə aparılan yazışmalar barədə sənədlər istəyib. O, həmçinin komitə əməkdaşlarının obyektlərə səfər etməsinə şərait yaradılmasını tələb edib.

    Məsələnin mərkəzində xAI-ın ABŞ-nin Tennessi və Missisipi ştatlarında yerləşən Colossus 1 və Colossus 2 superkompüter kompleksləri dayanır. Bu sistemlər xAI-ın Grok süni intellekt modellərinin hazırlanması və öyrədilməsi üçün istifadə olunur və olduqca böyük həcmdə elektrik enerjisi tələb edir. Yerli elektrik şəbəkəsinin bu tələbatı qısa müddətdə qarşılaya bilməməsi səbəbindən xAI məlumat mərkəzlərini enerji ilə təmin etmək üçün təbii qazla işləyən turbinlər quraşdırıb. Reuters-in məlumatına görə, təkcə Colossus 2 üçün 59 qaz turbini quraşdırılıb. Şirkətin bu miqyasda emissiya yaradan turbinlər üçün tələb olunan federal hava çirklənməsi icazələrini almadığı bildirilir.