xAI oyunlar və robotlar üçün virtual dünyalar yaradacaq

     Böyük dil modelləri ənənəvi olaraq mətn məlumatlarının iri həcmli bazaları əsasında təlim etdirilirdi, çünki bu, texniki cəhətdən daha sadə idi. Lakin onların inkişafının növbəti mərhələsi obyektlərin fiziki qanunları nəzərə alaraq bir-biri ilə qarşılıqlı əlaqədə olduğu virtual dünyaların yaradılmasını nəzərdə tutur. Elon Musk-ın xAI startapı artıq bu istiqamətdə fəaliyyətə başlayıb. Məlumata görə, şirkət bu yay NVIDIA şirkətindən iki mütəxəssisi işə götürüb ki, onlar videolar və robotlardan toplanan məlumatlar əsasında virtual dünyaların yaradılmasına kömək etsinlər. Elon Mask-ın startapı ilkin mərhələdə oyunlardan başlayaraq bu texnologiyaları tədricən insanabənzər robotlar üçün təlim mühitinin yaradılması sahəsinə daşıyacaq. Bu mühitdə robotlar real obyektlərin rəqəmsal əkizləri ilə təchiz edilmiş virtual dünyada daha sürətli inkişaf edə biləcəklər. NVIDIA özü artıq uzun müddətdir ki, oxşar simulyasiyalardan, xüsusən də nəqliyyatda avtopilot sistemlərinin təlimində istifadə edir.

     Konkret şəxslərə gəldikdə isə, xAI şirkəti Zeeshan Patel və Ethan He adlı mütəxəssisləri işə qəbul edib. Onlar əvvəlcə NVIDIA şirkətində çalışıblar və “dünya modelləri” (world models) sahəsində ixtisaslaşıblar. NVIDIA rəhbərliyi hesab edir ki, bu cür modellərin dövriyyəsi zamanla hazırkı qlobal iqtisadiyyatın miqyası ilə eyni səviyyəyə çatacaq. Birbaşa Elon Musk özü bəyan edib ki, xAI gələn ilin sonuna qədər süni intellekt vasitəsilə yaradılmış bir oyun təqdim etməyi planlaşdırır. Keçən çərşənbə axşamı startap video və şəkil generasiyası üçün yeni bir modeli təqdim edib və bu model istifadəyə tamamilə pulsuz açıqdır. Musk, bir müddət əvvəl video generatorunun yeni versiyasını təqdim etmiş rəqib OpenAI şirkətindən geri qalmamağa çalışır. Dünya modelləri praktik baxımdan böyük əhəmiyyətə malikdir, çünki onlar obyektlərin bir-biri ilə qarşılıqlı əlaqəsini real təcrübələr aparmadan anlamağa imkan verir.

     xAI süni intellekt vasitəsilə video və şəkil yaradılması sahəsində təcrübəyə malik mütəxəssisləri axtarmağa davam edir. Namizədlərə illik 180 000$-dan 440 000$-a qədər maaş təklif olunur. Startapda həmçinin videooyunlar üzrə təlimçi vakansiyası da mövcuddur. Bu şəxs Grok adlı çat-botu oyun dizaynı sahəsində təlimləndirəcək və istifadəçilərə onunla bu istiqamətdə qarşılıqlı işləməyə kömək edəcək. Bu vəzifə üçün ödəniş saatlıq 45-100$ aralığında dəyişir. Hazırda bir çox şirkət dünya modellərinin yaradılmasına maraq göstərir. Lakin bu sahədə təcrübəsi olan oyun tərtibatçıları xəbərdarlıq edirlər ki, süni intellekt sənayedə mövcud olan bütün problemləri həll edə bilmir. Məsələn, “Baldur’s Gate 3” oyununu hazırlamış Larian Studios nümayəndələri bildiriblər ki, əsas problem mexanikanın təkrarlanmasında deyil, istifadəçilər üçün həm real həyata bənzər, həm də maraqlı virtual dünyaların yaradılmasındadır.