Yahoo-dan yeni AI axtarış strategiyası!

    Technote.az “Mashable” platformasına istinadən bildirir ki, süni intellekt texnologiyalarının sürətlə yayılması media qurumları üçün ciddi problemlər yaradarkən, Yahoo fərqli yanaşma təqdim etdiyini iddia edir. Şirkət beta mərhələsində olan AI əsaslı axtarış sistemi Yahoo Scout daxilində yeni alətlərini təqdim edib və məqsədinin açıq internet ekosistemini dəstəkləmək olduğunu açıqlayıb.

    Yeni sistem xüsusilə digər böyük AI axtarış platformalarının daha qapalı modelindən fərqlənir. Yahoo bildirir ki, Scout istifadəçilərə təqdim etdiyi hər cavabda mənbələrə açıq istinadlar və publisher saytlarına yönləndirən keçidlər əlavə edir. Bununla həm istifadəçilər daha geniş kontekst əldə edir, həm də media saytları trafik itirmir.

    Son illərdə süni intellekt sistemlərinin xəbər məzmunlarını icazəsiz şəkildə toplaması və yenidən təqdim etməsi nəşriyyat sektoruna ciddi zərbə vurub. Araşdırma platforması Chartbeat tərəfindən yayımlanan yeni statistikaya görə:
    •    Kiçik media qurumları 2024 dekabr – 2025 dekabr aralığında axtarış trafikinin 60 %-ni,
    •    Orta ölçülü nəşrlər 47 %-ni,
    •    Böyük media şirkətləri isə 22 %-ni itirib.

    Bu tendensiya AI cavablarının istifadəçiləri birbaşa mənbə saytlarına yönləndirməməsi ilə əlaqələndirilir. Scout-un əsas fərqi AI cavablarının daxilində çoxsaylı linklərin göstərilməsi və publisher-lara açıq kredit verilməsidir. Bu yanaşma jurnalistlər, redaktorlar, bloqerlər və kontent yaradıcılarının əməyinin görünməsini qorumağı hədəfləyir. Ekspertlər hesab edir ki, əgər bu model uğurlu olarsa, AI dövründə gəlir və trafik itirən media sektoru üçün yeni balans yarana bilər.