Zuckerberg Çin süni intellekt modellərinin ABŞ-də qadağan edilməsinə qarşı çıxdı

    Mark Zuckerberg ABŞ hökumətinin Çin istehsalı olan süni intellekt modellərinin ölkədə istifadəsini məhdudlaşdırması və ya qadağan etməsi ideyasına qarşı çıxıb. Zuckerberg Financial Times-a müsahibəsində qabaqcıl Çin AI modellərinin ABŞ-də qadağan edilməsinin Çinlə texnologiya rəqabətində effektiv həll olmadığını bildirib.

    Zuckerberg hesab edir ki, ABŞ Çin modellərinə qarşı baryerlər yaratmaq əvəzinə, süni intellekt sahəsində hansı istiqamətlərdə geri qaldığını müəyyənləşdirməli və həmin problemləri aradan qaldırmalıdır. Onun fikrincə, texnologiyanın inkişafında əsas tendensiya daha çox açıqlığa və qabaqcıl texnologiyaların daha geniş istifadəçi və şirkət kütləsi üçün əlçatan olmasına doğru gedir.

    Meta rəhbəri eyni zamanda güclü AI modellərinə daha sərt nəzarətin tətbiqini müdafiə edən OpenAI və Anthropic kimi şirkətlərin yanaşmasını da dolayı yolla tənqid edib. Zuckerberg belə məhdudiyyətlərin süni intellekt texnologiyalarının az sayda şirkətin əlində cəmləşməsinə səbəb ola biləcəyini düşünür. Müzakirələrin yenidən aktuallaşmasının əsas səbəblərindən biri Çin AI şirkətlərinin sürətli inkişafıdır. Xüsusilə Moonshot AI tərəfindən iyulun ortalarında Kimi K3 modelinin təqdim edilməsi Çin modellərinin ABŞ şirkətlərinə rəqabət qabiliyyətini yenidən gündəmə gətirib.