Yango Group-un baş direktoru Bakıda startap ekosisteminin nümayəndələri ilə görüşəcək

    Noyabrın 12-də Bakıda qlobal texnologiya şirkəti Yango Group-un baş direktoru Daniil Şuleykonun (Daniil Shuleyko) iştirakı ilə startap ekosisteminin nümayəndələri üçün görüş keçiriləcək. SABAH.city innovasiya məkanında təşkil olunacaq tədbirdə texnologiya biznesinin beynəlxalq bazarlara çıxışı, şirkətlərin miqyaslandırılması və qlobal idarəetmə təcrübələri müzakirə ediləcək.

    Yango Group hazırda Latın Amerikası, Afrika, Yaxın Şərq və digər regionları əhatə edən 35-dən çox ölkədə fəaliyyət göstərir. Şirkətin müxtəlif bazarlarda qazandığı təcrübə görüşün əsas müzakirə mövzularından biri olacaq.

    Tədbir Tariyel Ağazadənin moderatorluğu ilə açıq söhbət formatında keçiriləcək. İştirakçılar beynəlxalq texnologiya şirkətinin idarə olunması, yeni bazarlara daxil olarkən qarşıya çıxan çətinliklər və fərqli ölkələrdə fəaliyyət göstərən komandaların koordinasiyası barədə məlumat əldə edə biləcəklər.

    Görüşdə startapların beynəlxalq bazarlara çıxmağa hazırlıq səviyyəsinin müəyyənləşdirilməsi, miqyaslanma zamanı yol verilən əsas səhvlər və şirkətlərin sürətli inkişaf tempini qorumaq üçün tətbiq etdikləri idarəetmə yanaşmaları da müzakirə olunacaq.

    Bundan əlavə, müxtəlif mədəniyyətlərə, istehlakçı tələbatlarına və biznes mühitlərinə uyğunlaşma, beynəlxalq komandaların formalaşdırılması və gələcəyin texnologiya liderlərinin sahib olmalı olduğu bacarıqlar haqqında fikir mübadiləsi aparılacaq.

   Müzakirələrin digər istiqaməti süni intellektin biznes proseslərinə və liderlik modellərinə təsiri olacaq. Süni intellekt texnologiyalarının inkişafı fonunda insan əməyinin və idarəetmə bacarıqlarının gələcəyi ilə bağlı suallara da toxunulacaq.

    Tədbirin əsas xüsusiyyəti iştirakçıların Daniil Şuleykoya birbaşa suallar ünvanlaya bilməsidir. Ənənəvi təqdimatlardan fərqli olaraq, görüş interaktiv dialoq formatında təşkil ediləcək.

    Təşkilatçıların məlumatına görə, tədbir Azərbaycanın startap təsisçiləri, sahibkarları və texnologiya mütəxəssisləri üçün nəzərdə tutulub. Görüş iştirakçılara 35-dən çox ölkədə fəaliyyət göstərən texnologiya şirkətinin beynəlxalq inkişaf və idarəetmə təcrübəsi ilə yaxından tanış olmaq imkanı yaradacaq.

    Tədbir noyabrın 12-də saat 15:00-dan 17:00-dək SABAH.city-nin Events Hall zalında keçiriləcək. İştirakçı sayı məhduddur və əvvəlcədən qeydiyyat tələb olunur.

    Qeydiyyat linkinə buradan keçid edə bilərsiniz.