5G dəstəkli bahalı olmayan smartfonlar üçün MediaTek Dimensity 6400 prosessoru təqdim edilib

     MediaTek şirkəti 5G dəstəkli bahalı olmayan smartfonlar üçün nəzərdə tutulmuş yeni prosessorunu təqdim edib. Söhbət, Dimensity 6400-dən gedir. Texniki olaraq  bu yeni prosessor Dimensity 6300-ün sadəcə bir qədər sürətləndirilmiş versiyasıdır. Qeyd etmək lazımdır ki, Dimensity 6300 isə öz növbəsində 3 il bundan öncə təqdim edilmiş Dimensity 6100+ prosessorunun sürətləndirilmiş versiyası idi.

     Beləliklə Dimensity 6400 prosessoru TSMC şirkətinin 6 nanometrlik texnoloji proses əsasında hazırlanıb və o özündə 8 nüvənin birləşdirir. Sözügedən yeni prosessorun tərkibində nüvələr “2 + 6” sxemi üzrə yerləşiblər. Yəni prosessor özündə 2.5 GHz tezlikdə çalışan 2 ədəd Cortex-A76 nüvəsini və 2.0 GHz tezlikdə çalışan 6 ədəd Cortex-A55 nüvəsini birləşdirir.

     Prosessorun qrafik imkanlarından Mali-G57 MC2 qrafik çipi cavabdehdir. Dimensity 6400 prosessoru 120 Hz-lik təsvir yenilənməsinə sahib 2520x1080 piksel keyfiyyətinə kimi olan ekranları, 108 MP-ə kimi olan kameraları, 16 MP + 16 MP ikili kameraları, LPDDR4x standartlı RAM yaddaşlarını və UFS 2.2 standartlı daxili yaddaş həcmlərini dəstəkləyir. Dimensity 6400-ə sahib ilk smartfonların yaxın zamanda təqdim olunacaqları gözlənilir.

Mənbə: MediaTek