Alphabet holdinqi Starlink analoqunu təsis edib

     Alphabet holdinqi, lazer şüaları vasitəsilə məlumat ötürmə texnologiyalarının hazırlanması üzrə ixtisaslaşan "X" innovasiya fabrikinin bir bölməsini Taara adlı müstəqil şirkətə çevirdi. Bu barədə The Financial Times məlumat yayıb. Yeni şirkət, SpaceX-in Starlink peyk xidməti ilə rəqabət aparır və çətin əlçatan, kənd yerlərinə internet təminatı gətirməyi hədəfləyir. Hal-hazırda Taara-nın texnologiyası, Loon startapının tədqiqatlarına əsaslanır və 20 km məsafədə 20 Gbit/s sürətlə məlumat ötürməyə imkan verir. Bu sistem sensorlar, optik komponentlər və güzgülərdən istifadə edərək uzaq bölgələrdə rabitə üçün fiberoptik xətlərini daha aşağı xərclərlə əvəz etməyə kömək edir.

     Taara şirkəti ABŞ-ın Kaliforniya ştatında, Google-un Mountain View-dakı qərargahına yaxın bir məkanda yerləşir. Şirkətdə 20 nəfər çalışır, lakin heyət aktiv şəkildə genişlənir. The Financial Times-ın məlumatına görə, Alphabet şirkətdə azlıq payını saxlayacaq. Həmçinin Taara, Series X Capital-dan maliyyələşmə alıb. Bununla belə, şirkət başlanğıc investisiyası və maliyyə hədəfləri barədə məlumat açıqlamayıb. Hazırda Taara 12 ölkədə, o cümlədən Hindistan və bəzi Afrika bölgələrində fəaliyyət göstərir. Şirkət Brazzavil və Konqo Demokratik Respublikasının paytaxtı Kinşasa arasında Konqo çayı üzərində 5 kilometrlik lazer körpüsü qurub.

     Bu ərazidə internet bağlantısı çox bahalı olduğuna görə bu texnologiya daha əlverişli bir alternativ təmin edir. Bundan əlavə, Taara mobil şəbəkələrin həddindən artıq yükləndiyi yerlərdə internet əlaqəsini gücləndirmək üçün istifadə olunur. Məsələn, Kaliforniyada keçirilən Coachella musiqi festivalında rabitə yükünü azaltmaq üçün tətbiq edilib. Taara şirkətinin nümayəndələrinin sözlərinə görə, onların texnologiyası Starlink ilə müqayisədə bir sıra üstünlüklərə malikdir. Taara terminalları sadəcə bir neçə saat ərzində dirəklərə, ağaclara və ya binalara quraşdırıla bilər. Bunun üçün kosmosa peyk göndərməyə ehtiyac yoxdur.

     Radiotezlik spektri üçün lisenziya hərraclarına ehtiyac qalmır, bu isə əlavə xərcləri azaldır. Lazer şüaları bir-birini maneəsiz kəsə bilər, halbuki radiotezliklərdə interferensiya problemi mövcuddur. Starlink fərdi istifadəçilərə birbaşa abunə xidmətləri təklif etdiyi halda, Taara böyük telekommunikasiya şirkətləri ilə əməkdaşlıq edir. Bunlara Bharti Airtel və T-Mobile kimi operatorlar daxildirlər. Taara-nın texnologiyası əsasən uzaq bölgələrdə əsas fiberoptik xətlərin genişləndirilməsi üçün, sıx şəhər mühitlərində, infrastruktur qurulması çətin və ya baha başa gələn yerlərdə əlavə rabitə bağlantısı yaratmaq üçün istifadə olunur.

Mənbə: The Financial Times