Amazon-un qurucusu Jeff Bezos: "Gələcəkdə Yer kürəsi orbitində süni intellekt üçün serverlər quraşdırılacaq"

     Keçən həftə İtaliyanın Turin şəhərində keçirilmiş texnoloji konfransda çıxış etmiş Amazon şirkətinin qurucusu və keçmiş rəhbəri Jeff Bezos yalnız süni intellekt sahəsinin vəziyyətini və yaxın gələcəyini dəyərləndirməklə kifayətlənməyib, həm də 10-20 il ərzində kosmosda məlumat emalı mərkəzlərinin yaradılmasının mümkün olacağına inamını ifadə edib. Bezos-un fikrincə, fasiləsiz günəş enerjisi axınlarına çıxış bu cür məlumat emalı mərkəzlərinə Yer üzərində yerləşən mərkəzlərdən daha yüksək performans göstərə bilməyə imkan verəcək. Onun sözlərinə görə, belə mərkəzlərin gücü giqavat səviyyəsinə çata bilər.

     “Məhz nəhəng öyrədici klasterləri kosmosda inşa etmək daha məqsədəuyğundur, çünki biz 24/7 rejimində günəş enerjisinə çıxış əldə edirik. Orada buludlu hava və yağış yoxdur, yəni hava şəraiti maneə yaratmır. Biz qarşıdakı bir neçə onillikdə yerüstü olmayan məlumat emalı mərkəzlərinin yaradılma xərclərini qarşılaya biləcəyik” - deyə Bezos bildirib. Jeff Bezos-un fikrincə, kosmik infrastrukturun inkişafına yönəlmiş bu dəyişiklik, kosmosun mənimsənilməsi sayəsində Yer üzündə həyatın yaxşılaşdırılmasına yönəlmiş daha genişmiqyaslı təşəbbüsün bir hissəsi olacaq.

     O, qeyd edib ki, bu proses artıq meteoroloji və telekommunikasiya peykləri ilə başlayıb. Növbəti mərhələ məlumat emalı mərkəzləri olacaq, daha sonra isə müəyyən növ istehsal fəaliyyətlərinə keçid baş verəcək. Süni intellektin geniş yayılma perspektivlərindən danışarkən Bezos əlavə edib: “Biz süni intellektin gətirdiyi sosial faydalar - internetin son 25 ildə yayılması ilə müşahidə olunanlara bənzər müsbət təsirlər - barədə son dərəcə optimist olmalıyıq. Bu faydalar realdır və uzun müddət davam edəcək”. O, həmçinin əmindir ki, potensial “balonları” və onların partlamasından doğa biləcək nəticələri - bunların baş verməsi də, baş verməməsi də mümkündür - obyektiv reallıqdan ayırmaq lazımdır.