AMD bazarda ən güclü neyron çipinə sahib yeni prosessorunu təqdim edib

     AMD şirkəti Ryzen AI 300 seriyasına daxil olan yeni prosessorunu təqdim edib. Söhbət, Ryzen AI 9 HX 375-dən gedir. Təqdim edilmiş bu prosessor hal-hazırda bazarda ən güclü neyron çipinə sahib prosessordur. Beləliklə TSMC şirkətinin 4 nanometrlik texnoloji prosesi əsasında hazırlanmış AMD Ryzen AI 9 HX 375 prosessoru 12 nüvəni əldə edib. Onlardan 4-ü Zen 5 nüvəsi, 8-i isə Zen 5C nüvəsidir. Prosessorun maksimal çalışma tezliyi 5.1 GHz təşkil edir. O özündə 28 MB həcmli L3 keş yaddaşını və 12 MB həcmli L2 keş yaddaşını birləşdirir. Prosessorun enerji sərfiyyatı isə 15-54 vatt təşkil edir. AMD Ryzen AI 9 HX 375-in əsas fərqləndirici tərəfi onun neyron çipidir.

     Belə ki, onun neyron çipinin performans göstəricisi 55 TOPS təşkil edir. Bu isə saniyədə trilyon əməliyyatın yerinə yetirilməsi deməkdir. Hətta AMD Ryzen AI 9 HX 370 flaqman prosessorunun neyron çipinin performansı 50 TOPS-dan yuxarı deyil. Müqayisə üçün qeyd etmək lazımdır ki, Intel Lunar Lake prosessorunun neyron çipinin performansı 48 TOPS, Qualcomm Snapdragon X Elite prosessorunun neyron çipinin performansı isə 45 TOPS təşkil edir. Beləliklə AMD Ryzen AI 9 HX 375 dünyanın ən güclü neyron çipinə sahib prosessoru olub. Hal-hazırda AMD-nin bu yeni prosessorunu əldə edəcək yalnız bir noutbukun adı məlumdur. Söhbət, HP OmniBook Ultra-dan gedir. Bu noutbukun təqdimatı isə sentyabr ayı üçün gözlənilir.