AMD noutbuklar üçün Radeon RX 7900M adlı yeni güclü videokartını təqdim edib

     AMD şirkəti gaming noutbuklar üçün nəzərdə tutulmuş Radeon RX 7900M adlı yeni flaqman mobil videokartı təqdim edib. AMD-nin sözlərinə əsasən sözügedən videokart hal hazırda bazarda olan ən güclü mobil videokartdır. Beləliklə Radeon RX 7900M özündə 72 ədəd hesablayıcı bloku, GDDR6 standartlı 16 GB VRAM-ı və 64 MB Infinity Cache-i (keş) birləşdirir. GPU-nun standart çalışma tezliyi 1825 MHz təşkil edir. Lakin Boost rejimində çalışma tezliyi göstəricisi 2090 MHz-ə yüksəlir.

     Videokartın enerji sərfiyyatı isə 180 vatt-a kimi təşkil edir. Müqayisə üçün qeyd etmək lazımdır ki, NVIDIA GeForce RTX 4080 videokartının enerji sərfiyyatı 110 vatt təşkil edir. AMD-nin sözlərinə əsasən Radeon RX 7900M-in kompüter oyunlarında performansı RTX 4080-nin performansından 7% yüksəkdir. Şirkət daxilində aparılmış testlər çərçivəsində yeni videokart "Starfield" oyununda RTX 4080-dən 27% daha çox fps-i təmin edib. Radeon RX 7900M-i ilk əldə etmiş noutbuk modeli Alienware m18 oldu.