Amerikalılar 2030-cu illərin əvvəllərində Marsa yollanmağı istəyirlər

     ABŞ gələcək onilliyin əvvəlində Marsa pilotlu missiya göndərməyi planlaşdırır, bunu verdiyi müsahibədə nəqliyyat naziri və NASA rəhbərinin səlahiyyətlərini icra edən Sean Duffy bildirib. O, qeyd edib: “Biz Ayda baza qurmağa başlamaq üçün ora faydalı yüklər göndərmək istəyirik və sonra 2030-cu illərin əvvəlində Marsa yollanacağıq. Bu, 8 ay davam edəcək missiya olacaq”. Artıq 2026-cı ilin yazında ABŞ 4 astronavtlı kosmik gəmi göndərməyi planlaşdırır. Gəmi Ay ətrafında dövrə vuracaq, eniş edəcək və insanlar onun səthində 8-12 gün qalacaqlar.

     O əlavə edib ki, indiyədək insan Ayda 3 gündən artıq qalmayıb. Tesla və SpaceX şirkətlərinin rəhbəri Elon Musk 2026-cı ilin sonunda Marsa insanabənzər robot Optimus-un da yerləşdirildiyi Starship kosmik gəmisini göndərməyi planlaşdırır. Biznesmenin fikrincə, əgər missiya uğurlu olarsa, növbəti imkan pəncərəsində pilotlu missiya başladılıb, artıq 2029-cu ildə eniş həyata keçirilə bilər, lakin o bunun üçün daha real tarixi 2031-ci il hesab edir. Marsın mənimsənilməsi planları barədə dəfələrlə ABŞ prezidenti Donald Trump və onun administrasiya üzvləri bəyanatlar veriblər. Dövlət başçısı vəzifəyə başladığı gün Marsa astronavtlar göndərib, orada ölkənin “ulduzlu-zolaqlı bayrağını” sancmaq istədiyini açıqlamışdı.