'Apple' cihazlarla əl ilə uzaqdan idarə texnologiyasının patentini aldı

    Bu texnologiyaya əsasən sistemin interfeysini idarə etmək üçün sadəcə olaraq əl ilə havada hərəkət etmək lazım olacaq. Patent sorğusunda istifadəçinin bədənini və ya hansısa bədən hissəsini təyin edərək onu sistem əmrinə çevirən kamera barəsində məlumat əks olunub. Bu cür kamera bədən hissələrinin istiqamətini və sürətini təyin edə biləcək. Çox güman ki, cihazlarla qarşılıqlı əlaqənin yeni üsulu artıq varolan TrueDepth kamera sistemləri üçün bir əlavə özəllik olacaq.

    Hal-hazırda həmin kamera sistemləri istifadəçi üzünün əzələlərinin hərəkətlərini təyin etmək üçün istifadə olunur. Bu isə Face ID texnologiyası və Animoji funksiyası üçün nəzərdə tutulub. Təbii ki, şirkətin bu texnologiyanı nə zaman və ya ümumiyyətlə nə vaxtsa reallaşdıracağı bilinmir. Lakin nəzərə alsaq ki, şirkət artıq üzün 50-ə yaxın əzələsinin hərəkətini təyin etməyi bacaran kamera sistemi yaradıb, TrueDepth kamera sistemləri vasitəsilə yaxın zamanda cihazlarla yeni əlaqə üsulları reallaşdırıla bilər.