Artemis II missiyası bu gün gerçəkləşə bilər

    Technote.az “Engadget” platformasına istinadən bildirir ki, NASA-nın Artemis proqramı çərçivəsində həyata keçirilən ilk pilotlu missiya Artemis II bu gün, 1 aprel tarixində start götürə bilər. Uçuş ABŞ-nin Florida ştatındakı Kennedi Kosmik Mərkəzindən həyata keçiriləcək. Start üçün iki saatlıq pəncərə açılıb və buraxılış yerli vaxtla saat 18:24-dən etibarən planlaşdırılır. NASA bildirib ki, hava şəraiti start üçün 80 faiz əlverişli hesab olunur.

    Agentliyin mühəndisləri martın 31-də Space Launch System (SLS) raketinin bütün əsas texniki yoxlamalarını tamamlayıb və raket buraxılış üçün son konfiqurasiyaya keçirilib. Aprelin 1-i səhər saatlarında isə yerüstü buraxılış sistemi aktivləşdiriləcək. Yanacağın raketə doldurulması prosesi canlı yayımla göstəriləcək və buraxılış prosesi NASA+, Amazon Prime və YouTube üzərindən izlənilə biləcək.

    Artemis II missiyası çərçivəsində NASA astronavtları Reid Wiseman, Victor Glover, Christina Koch və Kanada Kosmik Agentliyinin astronavtı Jeremy Hansen Ay ətrafında 10 günlük uçuş həyata keçirəcəklər. Bu missiya Space Launch System raketi və Orion kosmik gəmisinin ilk pilotlu uçuşu olacaq. Eyni zamanda bu, Apollo proqramından sonra insanların Yer orbitindən kənara ilk uçuşu kimi tarixə düşəcək.

    Missiya zamanı astronavtlar Yer orbitindən kənarda kosmik səyahətin insan orqanizminə təsirini araşdıracaqlar. Artemis II-nin buraxılışı əvvəlcə fevral ayına planlaşdırılmışdı, lakin hidrogen sızması səbəbilə təxirə salınmışdı. Mart ayında planlaşdırılan növbəti buraxılış isə helium problemi səbəbilə yenidən gecikdirilmişdi. Əgər bugünkü buraxılış baş tutmasa, növbəti start imkanı aprelin 6-na planlaşdırılıb.