Apple və Samsung kimi böyük şirkətləri batareya ilə təmin edən TDK adlı şirkət, bərk halda olan batareyalar üçün mövcud həllərdən 100 qat daha çox enerji sıxlığı təklif edən bir material hazırladığını açıqlayıb. CeraCharge adlanan bərk halda olan akkumulyator litium ərintisi və oksidə əsaslanan bərk elektrolitdən istifadə edir. Bu yenilikçi kompozisiya, batareyaların 1000Wh/L enerji sıxlığına malik olmasına imkan verir. Bu da, hazırda Apple cihazlarında istifadə edilən kütləvi istehsal olunan batareyalarla müqayisədə 100 dəfə artım deməkdir.

     Şirkətin inqilabi olduğunu iddia etdiyi batareya texnologiyası müxtəlif texnoloji cihazlara daha uzun batareya ömrü təklif edə bilər. Bildirilib ki, smartfonlar, saatlar, qulaqlıqlar və digər taxıla bilən qurğular bu texnologiya sayəsində həftəlik və ya aylıq doldurula bilər. TDK bildirib ki, enerji tutumunda böyük artımla yanaşı, oksid elektrolit batareyanı daha təhlükəsiz edir. Bu, həddindən artıq istiləşmə və partlayış riskini aradan qaldırır. Yeni batareyalar həmçinin birdəfəlik batareyaları qadağan edən Aİ (Avropa İttifaqı) qaydalarına da uyğundur. TDK bu texnologiyanı kütləvi istehsala keçirmək üçün çalışdığını bildirib. Şirkət, gələn il “Apple” və “Samsung” kimi müştərilərə nümunə tədarük etməyi planlaşdırır.