Bu il NVIDIA serverlərinin quraşdırılması isə insanabənzər robotlar məşğul olacaqlar

     Tayvanın texnologiya şirkəti Foxconn və ABŞ-nın süni zəka çip istehsalçısı NVIDIA, Hyuston şəhərində yerləşəcək Foxconn-un yeni zavodunda insanabənzər (humanoid) robotların tətbiqi ilə bağlı danışıqlar aparır. Bu zavodda NVIDIA-nın süni zəka serverləri istehsal olunacaq. Əgər layihə uğurlu alınsa, bu, hər iki şirkət üçün istehsalatda humanoid robotların bu qədər geniş miqyasda ilk dəfə istifadəsi baxımından ciddi bir irəliləyiş olacaq. Gözlənilir ki, robotların tətbiqi yaxın aylarda başa çatacaq. Foxconn hal-hazırda NVIDIA ilə birlikdə öz insanabənzər robotlarını inkişaf etdirir, eyni zamanda Çin şirkəti UBTech tərəfindən istehsal olunan robotların da sınaqlarını keçirir. Hələlik Hyuston zavodunda neçə humanoid robotdan istifadə olunacağı və onların hansı tipdə olacağı bəlli deyil.

     Məlumatlı mənbələrin bildirdiklərinə görə, Foxconn hazırda robotlara əşyaları götürüb yerləşdirməyi, kabelləri taxmağı və montaj əməliyyatlarını yerinə yetirməyi öyrədir. Foxconn-un Hyustondakı zavodu insanabənzər robotların tətbiqi üçün ideal hesab olunur, çünki bu tamamilə yeni bir müəssisədir və daha layihələndirmə mərhələsində robotların kütləvi şəkildə istifadəsi ilə bağlı bütün xüsusiyyətlər nəzərə alınıb. Yeni zavodun ilk məhsulu NVIDIA-nın GB300 serverləri olacaq və onların yığımı gələn ilin əvvəlində başlayacaq. Hyustondakı zavoda əlavə olaraq, NVIDIA Wistron şirkəti ilə tərəfdaşlıq çərçivəsində Dallasda da oxşar bir müəssisə inşa edir. Gözlənilir ki, hər iki zavod 12-15 ay ərzində planlaşdırılan istehsal həcminə çatacaq.

     Şayiələrə görə, Foxconn noyabr ayında keçiriləcək illik texnoloji tədbirdə şirkətin özü tərəfindən hazırlanmış iki fərqli robot versiyasını nümayiş etdirməyi planlaşdırır. Birinci variant insanabənzər robota əsaslanır, ikinci isə hərəkət üçün təkərli avtonom robot bazasından istifadə edir ki, bu da onu gəzə bilən modeldən daha ucuz edir. NVIDIA üçün humanoid robotlardan öz süni zəka serverlərinin istehsalında istifadə etmək təbii bir addımdır, çünki şirkət artıq robot istehsalçılarına təqdim etdiyi öz robot platformasını hazırlayıb. NVIDIA-nın rəhbəri Jensen Huang-ın fikrincə, humanoid robotların istehsal müəssisələrində geniş tətbiqi yaxın 5 il ərzində baş verəcək.