Dövlət televiziyası CCTV-nin bildirdiyinə görə, bu yüngül quruluşlu geyim, astronavtlara (taykonot və ya hángtiān yuán) Ay səthində gəzinti, dırmaşma, rover idarəetməsi və müxtəlif elmi tədqiqatlar aparmaq imkanı verəcək. Geyim, Ayın çətin şərtlərinə davam gətirəcək şəkildə istiliyə və Ay tozuna qarşı qoruma təmin edən xüsusi bir parçadan hazırlanıb. Həmçinin, aşağı cazibə qüvvəsi şəraitində hərəkət qabiliyyətini artırmaq məqsədilə diz oynaqlarına xüsusi mexanizmlər əlavə olunub.

     Çinin yeni kosmos geyimi, əvvəlki Ay gəzintilərində istifadə edilən ağır geyimlərə nisbətən daha incə quruluşdadır və qabaqcıl texnologiyalarla təchiz olunub. Kaska panoramik əks olunma əleyhinə üzlük ilə uzun və qısa fokuslu kameralar daxildir, sinə hissəsinə yerləşdirilmiş idarəetmə konsolu isə rabitə kimi kritik sistemlərlə əlaqəlidir. Bu xüsusiyyətlər astronavtların vəzifə zamanı daha səmərəli və təhlükəsiz hərəkət etmələrini təmin edəcək.

     Estetik baxımdan da önəmli detallara sahib olan geyim üçün Çin İnsanlı Kosmik Agentliyi (CMSA), bu yeni nəsil Ay geyiminə uyğun bir ad tapmaq məqsədilə xalq arasında bir müsabiqə təşkil edib. Müsabiqənin həm Çinin mədəni irsini əks etdirən, həm də qabaqcıl texnologiyanı vurğulayan bir ad ortaya çıxaracağı gözlənilir.

     Çin, Ayda ilk insanlı missiyasını 2030-cu ildən əvvəl həyata keçirməkdə qətidir. Bu plan çərçivəsində 2 ədəd Long March 10 raketi buraxılacaq. Onlardan biri astronavtları daşıyan ekipaj kapsulunu, digəri isə pilotsuz Ay eniş aparatını Ay orbitinə çatdıracaq. Orbitdə birləşəcək bu 2 aparatdan eniş aparatı, 2 astronavtı Ay səthinə endirəcək. Astronavtlar bir neçə saat davam edəcək elmi fəaliyyətlərdən sonra orbitdə gözləyən üçüncü ekipaj yoldaşı ilə görüşərək Yerə qayıdacaqlar.

     Lakin Aya dönüş yarışında təkcə Çin iştirak etmir. NASA da 1972-ci ildəki son Apollo missiyasından bəri ilk ekipajlı Ay enişi üçün çalışır. Bu kontekstdə agentlik, Artemis 3 proqramı çərçivəsində 2026 və ya 2027-ci illərdə Ayın cənub qütbünə astronavt endirməyi planlaşdırır. Yaxın gələcəkdə, Amerikan və Çinli astronavtların Ayın müxtəlif bölgələrində kəşfiyyatlar apardığını görəcəyimiz ehtimal olunur.