Çin istehsalı robotlar bazarı ələ keçirirlər

     İnsanabənzər robotlar hazırlayan çoxsaylı Çin startapları dünya miqyasında insanların diqqətini cəlb etməyi bacarıb və satışlarını sürətlə artırırlar. Məsələn, Unitree şirkəti ötən yarım ildə insanabənzər robotların tədarük həcmini əhəmiyyətli dərəcədə artırıb, baxmayaraq ki, dəqiq rəqəmlər açıqlanmır. İxtisaslaşmış startapların cəmləşməsi baxımından Çin robototexnika sənayesinin ürəyi kimi Handjou şəhərini göstərmək olar. Burada insanabənzər robotların hazırlanması və istehsalı ilə məşğul olan 6 şirkət fəaliyyət göstərir. Əgər ABŞ şirkəti Tesla öz Optimus robotunun kütləvi istehsalına hələ hazırlaşır və yaranmış problemlərə görə onun konstruksiyasını və təyinatını son anda yenidən nəzərdən keçirirsə, Çin şirkətləri artıq çoxfunksiyalı insanabənzər robotları rəqabətədavamlı qiymətlərlə bazara təqdim edirlər.

     Bazar ertəsi yayımlanmış rəsmi statistika göstərir ki, Çində bu ilin ilk yarısında sənaye robotlarının tədarükü ötən ilin eyni dövrü ilə müqayisədə 35.6% artaraq 369 316 ədədə çatıb. Servis robotlarının tədarükü isə 25.5% artaraq 8.8 milyon ədəd olub. Malların çatdırılması və tozsoran funksiyalarını yerinə yetirən robotlarla yanaşı, bəzi istisnalarla insanabənzər robotları da bu kateqoriyaya aid etmək olar, baxmayaraq ki, onlardan bəziləri istehsalatda tətbiq sahələri axtarır. Unitree şirkətinin illik gəliri artıq psixoloji hədd sayılan 1 milyard yuanı (təxminən 139.5 milyon dollar) keçib, şirkətin kapitallaşması isə 1 milyard dolları aşaraq onu “unicorn” (yəni 1 milyard dollardan artıq dəyəri olan) startap statusuna çatdırıb.

     Unitree-yə investisiya edənlər arasında Alibaba və onun törəmə şirkəti Ant Group, Tencent holdinqi, avtomobil istehsalçısı Geely, eləcə də TikTok-un yaradıcısı olan şirkətlə əlaqəli Jinqiu Capital var. Bu fon qarşısında Elon Musk-ın Tesla-nın ilin sonuna qədər 10 000 ədəd insanabənzər Optimus robotu istehsal etməyə hazır olduğu barədə bəyanatları artıq o qədər də iddialı görünmür. Şirkətin bu istiqamətdəki irəliləyişi davam edən kadr dəyişiklikləri ilə ləngiyir, əsas elektrikli avtomobil biznesində isə vəziyyət o qədər də yaxşı deyil. Optimus-un satışa çıxması gələn ildən tez baş tutmayacaq, bu müddətdə isə Çindən olan rəqiblər insanabənzər robotların kütləvi istehsalında xeyli daha sürətli irəliləyiş nümayiş etdirirlər.