Çin şirkəti iPhone qiymətində insanabənzər robotunu təqdim edib (VİDEO) - QİYMƏTİ

      Pekin startapı Noetix Robotics cəmi 9998 yuan (1370$) dəyərində olan Bumi adlı humanoid (insanabənzər) robotu təqdim edib - bu qiymət bir flaqman smartfonun və ya noutbukun qiymətinə bərabərdir. Yeni robotun hündürlüyü cəmi 94 sm, çəkisi isə 12 kq-dır və o, sənaye məqsədləri üçün deyil, tədris və ev istifadəsi üçün nəzərdə tutulub. Bu yenilik insanabənzər robotların kütləvi şəkildə yayılmasına yol açır və əvvəllər yalnız tədqiqat mərkəzlərinə məxsus olan texnologiyaları gündəlik həyatın bir hissəsinə çevirir. 94 sm hündürlüyə və 12 kq çəkiyə malik Bumi, Unitree və UBTECH kimi iri modellərlə rəqabət aparmaq əvəzinə, tədris və ev istifadəsi üçün nəzərdə tutulmuş kompakt, yüngül və ucuz robotlar üçün yeni bir sahə açır. Bu, humanoid robotları tədqiqat laboratoriyalarından kənara çıxarmaq cəhdidir. Noetix Bumi-ni “10 000 yuan qiymət həddindən aşağı olan ilk istehlakçı humanoidi” adlandırır.

     Belə aşağı qiymətə nail olmaq yüngül kompozit materiallardan, modul konstruksiyadan və sadələşdirilmiş hərəkət idarəetmə sistemindən istifadə sayəsində mümkün olub. Robot yeriyə, balans saxlaya və hətta rəqs edə bilir. Onun hərəkətləri olduqca axıcı və sabitdir - bu isə onun qiymət kateqoriyasına görə təəccüblü göstəricidir. Yeni Bumi bir dəfə şarj olunandan sonra 2 saatlıq avtonom fəaliyyət imkanı verir. O, səsli idarəetməni və elementlərin sürüklənib-buraxılması prinsipi ilə qrafik proqramlaşdırmanı dəstəkləyir ki, bu da onu proqramlaşdırma və texnologiya ilə qarşılıqlı əlaqəni öyrənmək üçün rahat vasitəyə çevirir. Şirkətin əvvəlki modeli olan Noetix N2 artıq 2500-dən çox sifariş alıb və hətta “humanoid yarımarafonunda” da iştirak edib. Bu uğurlar startapa Çin robototexnika sənayesində ən sürətlə inkişaf edən şirkətlərdən biri kimi mövqeyini möhkəmləndirməyə kömək edib.

     Bumi üçün ilkin sifarişlər Çin ticarət festivalları Double 11 (11 noyabr) və Double 12 (12 dekabr) arasında açılacaq. Bu, istehlak mövsümünün zirvəsinə hesablanmış strateji qərardır. 2023-cü ildə Tsinxua Universiteti və Çjetszyan Universiteti məzunları tərəfindən qurulmuş Noetix Robotics startapı cəmi 2 ildən az müddətdə laboratoriya tədqiqatlarından kütləvi istehsala keçməyi bacarıb. Müqayisə üçün, Qərb analoqları - məsələn, Tesla Optimus və ya Apptronik Apollo - bir neçə dəfə daha bahadır, sənaye robotları, məsələn Boston Dynamics Atlas, isə milyonlarla dollara başa gələ bilər. Bir müddət əvvəl Unitree 1.8 metr hündürlüyündə humanoid robot H2-ni, UBTECH isə tədris məqsədli Tiangong Walker modelini təqdim edib. Bumi isə qabaqcıl texnologiyalarla kütləvi bazar arasında körpü rolunu oynaya bilər - insanabənzər robotların gündəlik həyata smartfon və ya noutbuklar qədər təbii şəkildə daxil olmasına doğru atılmış növbəti addım kimi.