Çin texnologiya embarqolarına baxmayaraq superkompüter liderliyini geri qazanıb

    Çin dünyanın ən sürətli superkompüteri üzrə liderliyi yenidən ələ keçirib. Ölkənin Milli Superkompüter Mərkəzində fəaliyyət göstərən LineShine sistemi 2,198 eksaflops performans nümayiş etdirərək ABŞ-də yerləşən El Capitan superkompüterini geridə qoyub. Top500 reytinqinin yeni nəticələrinə görə, LineShine hazırda dünyanın ən güclü superkompüteridir. Sistem 1,809 eksaflops nəticə göstərən El Capitan-ı üstələməklə yanaşı, davamlı ikiqat dəqiqlikli hesablama performansında 2 eksaflops həddini aşan ilk yalnız CPU əsaslı superkompüter kimi tarixə düşüb.

    Maraqlıdır ki, LineShine digər qabaqcıl sistemlərdən fərqli olaraq qrafik prosessorlardan (GPU) istifadə etmir. Superkompüter xüsusi hazırlanmış 304 nüvəli prosessorlar üzərində qurulub və ümumilikdə 13,79 milyon hesablama nüvəsinə malikdir. Bu nüvələr 1,55 GHz tezlikdə çalışır və xüsusi hazırlanmış bağlantı texnologiyası vasitəsilə bir-biri ilə əlaqələndirilir. Sistem təxminən 42,2 meqavat enerji sərf edir və hər vat enerji üçün 52,07 giqaflops hesablama gücü təqdim edir. Top500 layihəsinin təşkilatçılarından olan doktor Cek Donqarra LineShine-ı “çox təsirli sistem” adlandıraraq bildirib ki, Çin GPU-lardan asılı olmayan alternativ yanaşma ilə ABŞ-ni qabaqlaya bilib.

    Yeni reytinqdə ümumilikdə beş superkompüter eksaskal səviyyəsini keçib. Onlardan biri Çində, üçü ABŞ-də, biri isə Almaniyadadır. ABŞ-ın Frontier sistemi 1,353 eksaflops nəticə ilə üçüncü, Aurora sistemi 1,012 eksaflopsla dördüncü yerdə qərarlaşıb. Almaniyanın Jülich Superkompüter Mərkəzində yerləşən Jupiter Booster isə 1 eksaflops göstəricisi ilə ilk beşliyi tamamlayır.