CMF Buds Pro naqilsiz qulaqlığı və CMF Power şarj adapteri təqdim olunub - QİYMƏTİ

    Nothing şirkətinin CMF subbrendi CMF Watch Pro smart saatı ilə yanaşı həmçinin CMF Buds Pro naqilsiz qulaqlığını və CMF Power şarj adapterini təqdim edib. İlk öncə naqilsiz qulaqlığa nəzər yetirək. CMF Buds Pro qulaqlığı ətraf səs-küyün aktiv boğulması funksiyası və bir dəfə şarj olunandan sonra uzun müddət ərzində çalışma özəlliyi ilə seçilir. Qulaqlıqların hər biri 10 mm-lik drayverlər ilə təchiz olunublar və basın gücləndirilməsi üçün nəzərdə tutulmuş Ultra Bass texnologiyasını dəstəkləyirlər.

    Bundan əlavə olaraq hər bir qulaqlıq 3 ədəd mikrofona sahibdir. Məhz həmin mikrofonlar ətraf səs-küyün aktiv boğulması funksiyasından cavabdehdirlər. Onların sayəsində qulaqlıqlar ətraf səs-küyü 45 dB-ə (desibel) kimi boğurlar. Üstəlik CMF Buds Pro şəffaf rejim dəstəyinə sahibdir. Bu rejim sayəsində ətrafda baş verənləri rahat şəkildə eşitmək mümkündür. Ətraf səs-küyün aktiv boğulması funksiyasının aktivləşdirildiyi halda qulaqlıqlar 6.5 saat ərzində, aktiv olmadığı halda isə 11 saat ərzində çalışa bilirlər.

    Şarj keysi sayəsində bu göstəricilər 22 saat və 39 saat təşkil edir. CMF Buds Pro həmçinin sürətli şarj texnologiyasının dəstəyinə sahibdir. 10 dəqiqəlik şarj prosesi sayəsində qulaqlıqlar 5 saat ərzində çalışa bilirlər. CMF Buds Pro 42$ qiymətində satışa çıxıb. CMF Power aksesuarına gəldikdə isə bu sadəcə adi şarj adapteridir. O, iki ədəd USB-C və bir ədəd USB-A girişinə sahibdir. Hər birr USB-C girişi 65 vatt çıxış gücünü, USB-A girişi isə 36 vatt çıxış gücünü dəstəkləyir. CMF Power 36$ qiymətində satışa çıxıb.